بلوچستان ءِ نامی ئیں اھوالکار ءُ ”سلگتا بلوچستان کتاب” ءِ نبشتہ کار ازیز سنگور گوشتگ کہ اے سال ءَ دو بلوچ جنین زورانسری بیگواہ کنگ نہ بیتگ، بلکیں بازیں جنین ءُ زھگے زورانسری آوار جنگ بیتگ۔ آئی رسانکدر ءَ وتی شنگ کرتگیں گزارشے ءَ بیگواھیں جنین ءُ زھگانی نام ءُ ڈس نبشتہ کرتگ اَنت کہ بلوچستان ءَ زورانسری بیگواھیں جنین ءُ زھگانی گزارش رسانکدر، یا چاگردی رسانکدر ءَ شنگ نہ بیتگ اَنت۔
آئی گوشتگ کہ چہ نورجان ءُ ھبیبہ ءَ اَبید بلوچستان ءَ جنین بازیں کچے ءَ بیگواہ بیتگ اَنت۔ ھمے سال ءَ پنجگور ءِ ھند گچک ءَ کرک ءِ ڈل ءَ جنین ءُ زھگ بیگواہ کنگ بیتگ اَنت۔ چہ آیاں شاہ بی بی ء سھراب، شھزادی ء اَبدُرھمان ءُ اَبدُرھمان ءِ ھواری ءَ کھول ءِ آدگہ مردم ھوار اَنت۔
ازیز سنگور گوشتگ کہ کیچ ءِ ھند تربت ءَ چونگی ءِ سر ءَ پاکستانی لشکر ءَ جنین ءُ زھگاں ھوار ھپت مردم آوار جتگ ءُ بیگواہ کرتگ اَت۔ اے بیگواہ بیتگیں مردماں چار سالی زھگ ریھان، سورت ء لال بکش، پاتمہ ء لال بکش، شش ماھی زھگے، نوری ء گپور، آمینہ ء ھمزہ، اتیکہ ء رشید ءُ دگہ مردم ھوار بیتگ۔
ازیز سنگور بلوچستان ءِ جیڑہ شریں وڑیں پوہ ءُ سرپد اِنت ءُ نامی ئیں اھوالکارے۔
چہ ایشی ءَ پیش جنگ آماچیں بلوچستان ءَ پاکستانی لشکر ءِ زوراکی ءُ دور دوریں ھنداں چیریں ادارھانی دست ءَ بلوچ ءِ زورانسری بیگواھی، کشت ءُ کوش، بلوچ ءِ چکچینی ءِ سر ءَ روتاکاں ھوار آئی ءَ یک کتابے ” سلگتا بلوچستان” ءِ نام ءَ نبشتہ کرتگ۔
بنشون: رسانکدر | اکس: رسانکدر
