ھندوستانی چیردستیں کشمیر ءَ ھندوستانی لشکر ءِ سر ءَ اُرش ءَ سے کارمند مُرتگ ءُ سروگانے ءَ ھوار پنچ کارمند ٹپی بیتگ اَنت۔
ھندوستانی رسانکدر ءِ رد ءَ کشمیر ءِ دمگ راجوڑی ءِ پرگال لشکری کیمپ ءِ سر ءَ وتکُش اُرش مروچی سھب ءِ وھد ءَ کنگ بیتگ۔
ھندوستانی شنگکاری ادارہ ‘این ڈی ٹی وی’ ءِ رد ءَ ناشرکاراں لشکری کیمپ ءِ نزیک ءَ جتگیں ٹٹ ءَ دَور کنگ ءِ جھد کُتگ گُڑ ءَ ھمے میان ءَ ھندوستانی لشکری کارمنداں آھانی سرءَ تیرگواری بندات کرتگ۔
دو نیمگی تیر گواری ءِ آسر ءَ ھندوستانی لشکر ءِ سئے کارمند مُرتگ ءُ سروگانے ءَ ھوار پنچ کارمند ٹپی بیتگ اَنت ءُ دو وت کُش کنوک ھم جنگ بیتگ اَنت۔ بنشون: جھانی رسانکدر | اکس: دامگ
