زور بیگواھیں استاد واھد کمبر ءِ جنک شاری واھد کمبر ءَ استاد واھد کمبر ءِ کیس ءِ بابت ءَ وتی درشانے ءَ گوشتگ کہ مرچی کیس ءِ درسیں منانک سرجم کرتگ اَنت ءُ آمیدگس ءَ وتی پیسلہ کرتگ۔ ما واھد کمبر ءِ کیس ءِ بابت ءَ ریاست ءِ لیکہ ءَ سرپد ایں۔ چہ ریاست ءُ آئی ادارھانی رویشتاں انچوش گمان کنگ بیت کہ آ وتی منشا ءَ کار کنگ لوٹ اَنت ءُ وت ءَ چہ کانود ءِ جست ءَ پھریزگ لوٹ اَنت۔
آئی ءَ گوشتگ ما ریاست ءَ اے موکل ءَ نہ دے ایں کہ آ اے جیڑہ ءَ آمیدگس ءَ پیش کنگ ءَ ابید میان میار ایت ءُ سر ءَ بہ گوازین ایت۔ مئے جھد برجاہ بیت ءُ ما یکشل ءَ ھمے لوٹ ءَ کن ایں کہ واھد کمبر آمیدگس ءَ پیش کنگ بہ بیت ءُ کانود ءِ رد ءَ دلجمی دیگ بہ بیت۔
شاری واھد کمبر ءَ گوشتگ کہ درکانودی بندیگ ءِ کانود ءَ پیش کنگ ءِ لوٹ یک کانودی کارے۔ اگاں اے تکنیکی بنیاد ءَ ھلاس کنگ ءُ دومی پریک ءِ گپ ءِ گوش دارگ ءَ ابید پیسلہ کنگ بہ بیت، گڑا اے کانود ءِ بگیری اِنت۔
آئی ءَ گوشتگ اے بژنی گپے کہ جسٹس اکبال کاسی ءَ درکانودی کرتگ ءُ پہ پیسلہ ءَ لوٹ کنگ ءِ ودار نہ کرتگ ءُ دوئیں کیسانی پیسلہ کرتگ۔اے پہ آمیدگس ءِ جست ءُ پرس ءَ جست ودی کنت۔
آئی ءَ گوشتگ کہ اے وڑیں گامگیج کانود ءَ نزور کنت ءُ مردمانی بنکی ھکاں سانمند کنت۔ وھدے کہ ادارہ گوں پٹ ءُ پول ءُ زمہ واری ءَ کار مہ کن اَنت گڑا مھلوک ءِ بیسہ ھلاس بیت ءُ انچوش گمان کنگ بیت کہ ناھکی یے۔
شاری واھد کمبر ءَ گوشتگ دانکہ مارا انساپ نہ رستگ ما کانود ءِ رد ءَ توار چست کن این ءُ انساپ ءِ لوٹ ءَ کن ایں۔ ما واھد کمبر ءَ کدی بے ھال نہ کن این ءُ ریاست ءَ یل نہ کن ایں کہ آ وتی دلیگاں بہ کنت۔ ما ھمے لوٹ ءَ کن ایں واھد کمبر آمیدگس ءَ پیش کنگ بہ بیت۔
بنشون: درشان اکس: رسانکدر
