بلوچ لبریشن آرمی ءِ جارکش جیئند بلوچ ءَ ماں رسانکدر ءَ وتی شنگ کرتگیں درشانے ءَ گوشتگ که بی ایل اے ءِ سرمچاراں دشت، نسیرآباد، تربت ءُ نوشکے ءَ چار جتائیں کاروائی کرتگ، زورگریں لشکر گوں بمب اُرش، گوں سلاھاں اُرش ءُ دگ ءِ بند کنگ ءِ بنیاد ءَ نشانگ کرتگ.
آئی ءَ گوشتگ که بی ایل اے ءِ سرمچاراں گوستگیں روچ ءِ سھب ءِ ادار ده ءِ نزیک ءَ کیچ ءِ ھند دشت، درچکو ءَ زورگریں پاکستانی لشکر ءِ بمب پٹوکیں پیادگیں کارمند ھما وھد ءَ گوں بمب اُرش ءَ نشانگ کرتگ اَنت که ھمے ھند ءَ بمب ءِ درگیجگ ءَ بیتگ اَنت. بمب تراک ءِ آسر ءَ دژمن ءِ یک کارمندے ھما وھد ءَ مرتک ءُ دو ٹپی بیتگ.
جارکش ءَ گوشتگ که دگه یک کارے ءَ سرمچاراں پنچ شمبے ءِ شپ ءَ نسیرآباد ءِ ھند نوتال ءَ مزنیں شھدگ داں دو ادار ءَ بستگ ءُ گاڑی پٹ ءُ پول کرتگ اَنت. ھمے میان ءَ پولیس ءِ کارمنداں نزیک بوگ ءِ جھد کرتگ که سرمچاراں اُرش کرتگ ءُ پدکنز کنگ ءَ لاچار کرتگ اَنت.
آئی ءَ گوشتگ که سیمی کار ءَ بی ایل اے ءِ سرمچاراں دوشی تربت ءَ زورگریں پاکستانی لشکر ءِ کارمند ھما وھد ءَ گوں دستی بمب ءَ نشانگ کرتگ اَنت که اسٹار پلس مارکیٹ ءِ نزیک ءَ دگ بندی ءَ بیتگ اَنت.
جارکش ءَ گوشتگ که چارمی کاروائی ءَ سرمچاراں نوشکے ءِ ھند کادرآباد ءَ اُرشے ءَ نکیب الله ء میرا جان مینگل کشتگ. نکیب الله زورگریں پاکستانی لشکر ءِ کارمندے بیتگ که آئی ءَ لشکر ءِ یل کنگ ءِ پژدر ءَ چیریں اداره ( ایم آئی ) ءِ چاریگی ءُ کمکاری ءِ کرد پیلو کرتگ۔
آئی ءَ گوشتگ که نکیب الله ءَ نوشکے ءُ کش ءُ کراں په دژمنیں لشکر ءَ چاریگی ، ورناھانی په لشکر ءَ کار ءَ زورگ ءُ زوریں بیگواھیانی کمکاری کرتگ. آئی ءَ گسانی سر ءَ بیڑ برگ، چادر ءُ چاردیوالیانی پادمال کنگ ءُ ورناھانی ملام دیگ یا لاچار کنگ ءِ بنیاد ءَ په دژمن ءَ کار کرگ ءِ وڑیں کاراں تچک ءَ ھوار بیتگ.
جارکش ءَ گوشتگ که بلوچ دژمنیں کارانی سوب ءَ نکیب الله بی ایل اے ءِ نشانگ ءَ بیتگ که سرمچاراں نشانگ کرتگ ءُ گڈی آسر ءَ سر کرتگ ، نوشکے ءَ په پاکستانی لشکر ءِ کمکاری ءُ چاریگی کنوکیں مردمانی سر ءَ بی ایل اے ءِ چیریں بھرگ "زراب ” ءَ چم سک داتگ اَنت ءُ آ ھم نکیب الله ءِ وڑ ءَ کنگ بنت.
جیئند بلوچ ءَ چاریں اُرشانی زمه واری من اِتگ.
