شال: پہ وائس پار بلوچ مسنگ پرسنز (وی بی ایم پی) ءِ زھرشانی گدان ءَ 6148 روچ سرجم بوتگ۔
دوشمبے ءِ روچ ءَ وی بی ایم پی ءِ چیرمین نسراللہ بلوچ ءَ زوربیگواھیں مردمانی کیسانی درگت ءَ گوں کمیشن ءِ ڈپٹی رجسٹرار ابدلھمید ءَ گند ءُ نند کرتگ۔ گند ءُ نند ءَ زوربیگواھیں نودربر سروک شبیر بلوچ، نسرینہ بلوچ ءُ زیشان ءِ کیسانی سر ءَ تران کرتگ۔
نسراللہ بلوچ ءَ گوشتگ کہ شبیر بلوچ ءِ کیس کمیشن ءِ دیم ءَ پیش کنگ بوگ ءَ نہ اِنت۔ نسرینہ بلوچ ءِ کیس منگ نہ بوتگ ءُ گل ءِ کر ءَ دیم دیگ بوتگ۔ ھمے وڑ ءَ زیشان ءِ کیس ءَ چار ماہ ءِ گوزگ ءَ ابید گامگیج زورگ نہ بوتگ۔
آئی گوشتگ کہ نسراللہ بلوچ ءَ گند ءُ نند ءِ وھد ءَ سَے ئیں کیسانی سر ءَ زوت گامگیج زورگ ءِ لوٹ کرتگ۔ اے درگت ءَ کمیشن ءِ ڈپٹی رجسٹرار ءَ دلجمی داتگ کہ نسرینہ بلوچ ءُ زیشان بلوچ ءِ کیسانی سر ءَ زوت گامگیج زورگ بیت۔ شبیر بلوچ ءِ کیس ءِ سر ءَ نوک کاروائی کنگ بیت دانکہ اے سرپدی بہ بیت کہ آ کجام بنیاد ءَ بندیگ کنگ بوتگ۔
آئی گوشتگ کہ کیس ءِ درگت ءَ وی بی ایم پی ءَ سرپدی دیگ بیت ءُ ایشی ءَ دوبر ڈیھ راھبند ءُ کانود ءِ رد ءَ دیم ءَ برگ ءَ دلگوش دیگ بیت۔
چیرمین نسراللہ بلوچ ءَ گوشتگ کہ ھمے اوست ءَ داریں کہ کمیشن نہ تھنا اے کیسانی سر ءَ زوت گامگیج زور ایت بلکیں درسیں زوربیگواھیں مردمانی آجوئی جوانیں کردے پیلو کنت۔
بنشون: درشان اکس: وی بی ایم پی
