بلوچ وومن پورم ءِ سروک ڈاکٹر شلی بلوچ ءَ اکوام متھدہ ءُ میان استمانی انسانی ھکانی ادارھانی نام ءَ یک نمدی یے نبشتہ کرتگ ءُ بلوچستان ءَ زوریں بیگواھیانی گیش بوگ، ھاس زالبولانی آوارجنی ءُ زور بیگواھی ءِ سرءَ ترس پدر کرتگءُ زوتیں دزمانجنی ءِ لوٹ کرتگ۔
ڈاکٹر شلی بلوچ ءَ وتی نمدی ءَ سے زالبول ھدیجہ بلوچ، ھسینہ نوربکش ءُ گل بانوک ءِ زوریں بیگواھی ریاستی زوراکی لیک اِتگ اَنت ءُ گوشتگ کہ اے زالبول نہ سیاسی کارکن اَنت ءُ نہ میاربار اَنت، بلکیں نودربر ءُ گسی زالبول اَنت۔
آئیءَ گوشتگ کہ ھدیجہ بلوچ نرسنگءِ نودربرے چہ بولان میڈیکل کالج ءِ ھاسٹل ءَ آوار جنگ بوتگ۔ ھسینہ نوربکش چہ کراچی ءِ ھند نیول ءَ آوارجنگ بوتگ۔ گل بانوک تاج چہ کیچ ءِ ھند سنگ آباد ءَ آوار جنگ بوتگ۔ آیانی کھولاں آیانی جاہءُ جان سلامتی ءِ بابت ءَ ھچ سرپدی دیگ ءَنہ اَنت۔
نمدی ءَ گوشگ بوتگ کہ بلوچ وومن پورم گوں میان استمانی ادارھاں لوٹ کنت کہ آ بلوچستان، کراچی ءُ کیچ ءَ مشن دیم بہ دنت۔ چہ پاکستانءَ لوٹ بہ کنت کہ زالبولاں آمیدگس ءَ پیش بہ کنت۔ چیریں ادارھانی نیمگ ءَ زالبولانی بگیری ءَ کاروائی کنگ ءِ سرءَ پابندی جنگ بہ بیت۔
ڈاکٹر شلی بلوچ ءَ نمدی ءِ گڈی ءَ نبشتگ کہ ھمک روچ زالبولانی زندگ بوگ ءِ گمان کم بوگ ءَ اِنت۔ آیانی زھگ وداریگ اَنت ءُ مات گریوگ ءَ اَنت، نوں جھانءَ گیشتر بے توار بوگ نہ لوٹ ایت۔
بنشون: نمدی اکس: رسانکدر
