بلوچ اسٹوڈنٹس ایکشن کمیٹی ءِ بنجاھی جارکش ءَ وتی درشانے ءَ گوشتگ کہ واجہ سید زھور شاہ ھاشُمی 21 اپریل 1926 ءَ واجہ سید مھمد شاہ ءِ گِس ءَ ماں گوادر ءَ ودی بوتگ۔ واجہ ءِ نام اھور اھمد اِنت ءُ ھاشُمی آئی ءِ پنام اِنت۔ واجہ وتی بنداتی وانگ ءَ ماں گوادر ءَ سرجم کنت ءُ ھمے میان پارسی ءُ اربی زبان ھم در بارت۔ واجہ پہ بلوچ، بلوچی ءُ بلوچستان ءَ گوھرے بوتگ کہ آئی ءَ وتی سرجمیں زند پہ بلوچی لبزانک ءُ پہ بلوچستان ءَ ندر کتگ، آئی ءِ زانت ءُ پگر چو گوادر ءِ زِر ءَ جھلانک اَت، کہ وتی سرجمیں زِند ئِے پہ بلوچی ءِ رکینگ ءَ گوازینتگ۔
آئی ءَ گوشتگ کہ سید بلوچی زبان ءُ لبزانک ءِ ھمک نوکیں پھناتانی سازوک اِنت، آئی ءَ بلوچی زبان ءَ بِنداتی زبان ءِ رھبند، اولی گِدار نازُک، اولی بزانت بلد سید گنج، نِمدیانی نبیسگ ءِ رواج، سپرنامگ نبیسگ ءِ بِنداتی رواج ءَ ھوار بلوچی لبزانک ءِ جتائیں پھناتاں بِنداتی سازوک بیتگ۔ یک ءُ تھنائیں مرد ءَ گِدار، آزمانک، سپرنامگ، نِمدی، نگد، چمشانک، شئیر ءُ ایدگہ تھرانی لبزانک نبیس اِتگ، اشاں ھوار ماھتاک، روتاک، ریڈیو، تامر ءُ ایدگہ پِڑاں کار کنگ ءَ ھوار پہ بلوچ ءَ لبزانکی ءُ راجمانی ادارہ ئِے ھم جوڑ کتگ۔ اے کُلیں پِڑ ءُ تھراں آئی ءَ ناں تھنا کار کُتگ بلکیں وتی دل ءُ جان ءَ گوں سرجمیں زِند ءِ کٹ ءُ کمائی پہ بلوچ ءُ بلوچی ءَ ھرچ کتگ ءُ نوکیں چِزانی بُن ھشت ئِے ایر کتگ۔ آئی ءِ زِند ءِ مال ءُ متا تھنا بلوچ ءُ بلوچی اَت، آئی ءَ نپری بستار ءَ یک سرجمیں ادارہ یے کار کُتگ اَنت۔
آئی ءَ گوشتگ کہ سید ءَ وتی ماتی زبان ءَ گوں ھمنچو مھر اَت کہ آئی پہ بلوچی زبان ءَ بلوچ ءِ میتگ میتگ ءُ کوچگ کوچگ ءَگولیت ءُ لبزانی امبار شوھاز کُت۔ مردماں سید ءَ وڑ وڑیں نام بست ءُ گوْشت کہ آ گنوک اِنت، شیپتال اِنت بلے سید ءَ دمانے ھم اے تھمت کِمار نہ کُت اَنت ءُ پہ بلوچی زبان ءَ جھد کنگ ءِ میار وتی کوپگاں زُرت۔ آئی ءَ مھلوک جورجوابی ءَ درائینت ءُ گوشت کہ نہ بیتگ مادنیں راہ ءَکسے گار، نہ تَراں ھرکس ءَ پھکا جواب اِنت،ھمے جورجوابی ءُ وتی جھد ءُ مادنیں راہ ءِ سر ءَ آئی ءِ سِتک اَت کہ ایشی ءِ برورد ءَ بلوچی زُبان ءُ لبزانک ءِ باندات گِش اِت ءُ وت ءَ بلوچ راج دپتر ءَ داں ابد نمیران کُت۔
آئی ءَ گوشتگ کہ اے کلیں کاراں چہ پد سید ءَ تھنا لبزانکی تک ءَ بند کنگ آئی ءِ کتگیں کار ءُ آئی بستار ءَ جھل کنگ انت۔ سید یک سیاسی کواسے بوتگ بلکیں مروچی اوں لبزانکی ءُ سیاسی تک ءَ مئے رھشونی ءَ کنگ ءَ انت، آ سیاسی سِنچ ءَ گوں سرَیچ وتی زِند ءَ ھمک وڑیں اڈاندانی دیمپان بوتگ، آ مھلوک ءَ بد ءُ رد کُت، آئی ءَ گنوک ءُ گژدال لیک ایت، ھزار بُھتام اِش جت، شگانانی زَد ءَ اَت بلے اے دلیر ءُ دیرچاریں مرد ءَ کس بئے نہ کُت، گوشان ءِ مورے ءَ ھم نہ وارت پرچاکہ آ باسما اَت، آئی ءَ زانتگ اَت اے توم ءَ کہ آ کِشگ ءَ اِنت چہ ایشی ءِ براں راج ءَ نپ ءُ پائدگ رس ایت ءُ بانداتیں پدریچ ءِ ھستانک رک اِت کنت۔ ھما مردم کہ آ وھد ءَ سید ءِ پُچوکاں کپتگ اِت اَنت، سید ءَ آھاں تچک ءَ گوشتگ کہ آھاں پھک ءَ جواب اِنت بلے آ وتی راجی جھد ءَ پُشت کِنز نہ بیت۔ ھمے پھک ءَ جواب دیگ ءُ راجی لیکہ ءَ گوں مھکمی ءَ اوشتگ ءِ سوب ءَ مرچی بلوچ ءُ بلوچی لبزانک مرگ ءِ دیناں چہ رک اِتگ۔
آئی ءَ گوشتگ کہ واجہ سید زھورشاہ ھاشُمی ءَ وتی دراھیں زند ءَ پہ بلوچی ءُ بلوچستان ءَ ندر کت، 4 مارچ ھما شُمّیں روچ اَت کہ واجہ ءَ اے کوڑھیں امروز ءَ یل کُت ءُ نمیران بوت۔ بلے مروچی ئیں روچ ھما روچ انت کہ سد سال پیش سید ودی بیت ءُ پہ بلوچ ءُ بلوچی لبزانک ءَ یک گوھرے جوڑ بیت۔ آئی ءِ سد سالی بوتن روچ ءَ گل آئی ءَ ستک شانی ندر کنان ءَ آئی ءِ کتگیں کار ءُ راجی جھد ءَ پھر ءِ نگاھاں چار ایت۔ سید یک سرجمیں راجدوستے اَت ءُ آئی ءَ بگندئے مرچی جسدی رنگ ءَ مارا یل کتگ بلے آئی ءِ جھد ءُ پگر انگت ھمک بلوچ ءِ دل ءَ زندگ اِنت، پمیشکا ورنایاں لوٹ ایت کہ سید ءَ بہ وان اَنت، بہ پھم اَنت ءُ چہ آئی ءِ جھد ءُ زانت ءَ در بہ بر اَنت ءُ پہ بلوچ ءُ بلوچی ءَ وتی راجی بھرشت ءَ بہ دیے اَنت۔
بنشون: درشان اکس: رسانکدر
