بلوچ وومن پورم ءِ سروک ڈاکٹر شلی بلوچ ءَ وتی درشانےءَ گوشتگ کہ زبیر بلوچ 16 اپریل ءَ چہ وتی لوگ ڈی جی ءَ ریاستی چیریں ادارھانی دست ءَ زوربیگواہ کنگ بیت،آ وتی نودربری ءِ وھد ءَ بلوچ اسٹوڈنٹس کونسل بھاولپور ءِ چئیرمین ھم بیت ءُ چہ اسلامیہ یونیورسٹی بھاولپور ءَ ایم پل ھم کنت۔
آئیءَ گوشتگ کہ اگاں چوناھیا ما بہ چار اِیں بلوچستان ءِ تہ ءَ وانندھانی مزنیں کچّے ریاست ءِ زندانانی تھاریں کوٹیانی تہ ءَ آزار سگگ ءَ اَنت ءُ دو ھمنچو نشانگ کنگ ءُ کُشگ بوگ ءَ اَنت، چی ءَ کہ پہ یک زیردستیں راجے ءَ استان کدی نہ لوٹ اِیت کہ آ راج دیمروئی بہ کنت۔ پمیشکا آ بودناک ءُ وانندگیں سراں نشانگ کنت ءُ ایردستیں راج ءَ پہ مُدامی تاروکی ءِ تہ ءَ چگل دیگ لوٹ اِیت، چی ءَ کہ بودناک ءُ وانندگیں سر ایردستیں راج ءِ رُژنائیں چم اَنت۔
ڈاکٹر شلی بلوچ ءَ گوشتگ کہ ھمے رنگ ءَ ریاست مُدام پہ زیردستیں راج ءِ مجگ ءَ تُرس پیداک کنگ ءَ گراؤنڈ ءِ تہ ءَ نوک نوکیں رپک ءُ پندل سازیت دانکہ مردم بیمّ ءِ آماچ بہ بنت ءُ وتی چماں گوں دیستگیں زلم ءُ زوراکیانی واستا توار چست مہ کن اَنت، بلے مارا چہ ریاست ءِ مکر ءُ پندلاں آشنا بوگی اِنت ءُ بلوچ چکچینی ءِ بگیری ءَ بے تواری پروش دیگی اِنت۔
آئیءَ گوشتگ کہ زبیر بلوچ ءَ ھوار گار ءُ بیگوائیں بلوچ پُسگانی مھکمیں توار جوڑ بوگی اِنت ءُ بلوچ ءِ باندات ءِ پد جنگ ءَ مارا یکجاہ ءُ ھم کوپگ بوگی اِنت۔ اگاں ما وھد ءِ گّوانک ءُ توار گوش نہ داشت، گڑا زبیر ءِ رنگ ءَ مئے بودناک ءُ وانندگیں سر ھرروچ زندان ءِ تھاریں کوٹیاں بندیگ ءُ پہ زور بیگواہ کنگ بنت، پمیشکا مارا بے تواری ءِ دامن چاک دیگی ءُ راستی ءِ توار برز ءُ بُلند کنگی اِنت۔
بنشون: درشان اکس: دامگ
