شال ءَ پہ زور بیگواھیں مردمانی آجوئی ءَ وائس پار بلوچ مسنگ پرسنز ءِ زھرشانی گدان ءَ شال پریس کلب ءِ دیم ءَ 6139 روچ سرجم بوتگ۔ مرچی زور بیگواھیں سھیل اھمد ءِ براس جمیل بلوچ ءَ گدان ءَ اتکگ ءُ وتی زھرشانی یاداشت کرتگ۔
جمیل اھمد ءِ گوشگ اِنت کہ منی براس سھیل اھمد ء لال مھمد ءُ آئی سنگت سپی اللہ ء سئید ابدروپ شاہ یک نومبر 2021 ءَ چہ بلوچستان یونیورسٹی ءَ بیگواہ کنگ بوتگ اَنت۔
آئی ءَ گوشتگ کہ سرکار ءَ پہ اے جیڑہ ء گیش ءُ گیوار ءَ بلوچستان ءِ وزیر ابدرھمان کیتران ءِ سروکی ءَ یک پترے جوڑ کرتگ کہ آئی داں پانزدہ روچاں گامگیج زورگ ءِ دلجمی داتگ، بلے نوں پنچ سال گوستگ انگت ءَ ھچ وڑیں گامگیج زورگ نہ بوتگ۔
آئی ءَ گوشتگ کہ گوستگیں پنچ سال اِنت ما پہ انساپ ءِ لوٹگ ءَ ھمک در ٹک اِتگ ءُ وتی براس ءِ آجوئی ءِ لوٹ کرتگ، آئی بابت مارا انگت ءَ سرپدی دیگ نہ بوتگ، چہ ایشی ءَ مئے کھول جنجال اِنت۔
وی بی ایم پی ءِ چیئرمین نسر اللہ بلوچ ءَ جمیل بلوچ دلجمی داتگ کہ گل سھیل ءُ سپی ءَ ھوار پہ درسیں مانی کیساں کانود ءِ رد ءَ ھمک جاہ ءَ توار چست کنت ءُ آیانی سلامتی آجوئی ءِ لوٹ ءَ کنت۔
بنشون: درشان اکس: وی بی ایم پی
