بلوچ لبریشن آرمی ءِ جارکش جیئند بلوچ ءَ وتی درشان ءَ گوشتگ کہ زورگپتیں بلوچستان ءَ پاکستانی پوج ءِ بگیری ءَ بی ایل اے ءِ سرمچاراں 29 مارچ ءَ ترندیں ارش بندات کرتگ اَنت داں یک اپریل ءَ برجاہ بوتگ اَنت۔
آئی ءَ گوشتگ کہ سرمچاراں پَنجگُور، شاپک، بیسیمگ، سبی، نسیر آباد، ڈیرہ بگٹی، مستونگ، شال، نوشکی، زامران، دشت، سوراب، جھل مگسی، دالبندین، ھاران، واشک ءُ کلات ءَ 65 کاروائی کرتگ۔ اے اُرشاں زورگریں پوج، کشندہ ٹولی ءُ چیریں ادارھانی 86 ءَ گیش کارمند مرتگ ءُ درزنانی کچ ءَ ٹپی بوتگ اَنت۔
جارکش ءَ گوشتگ کہ اے ارشاں زورگریں پوج ءِ بنجلاں ھوار ائیربیس، ریڈار سسٹم، رھوتی ٹاور، ریلوے ٹریک، پھل ءُ گیس پائپ لائن نشانگ کرتگ اَنت، شھدگ داں باز اداراں بستگ اَنت۔ زورگریں پوج ءِ گون ءَ میڑانی میان ءَ پنجگور ءَ پنچ سنگت زاھد، سنگت سئید اللہ، سنگت جھانزیب، سنگت آمر ءُ سنگت سدام، زامران ءَ سنگت ابدوست ( ابدرھمان ) شھید بوتگ۔
آئی ءَ گوشتگ کہ شھید سنگت زاھد پنام نواز ء شیرمھمد پَنجگُور ءِ ھند گچک ءِ جاہ منند اِنت آئی 2016 ءَ سلاہ بندیں جھد بندات کرتگ ءُ 2023 ءَ بی ایل اے ءَ ھوار بوتگ۔ شھید زاھد نہ ترسیں جنگول ءُ تجربہ کاریں سرمچارے اَت۔ آئی گچک، کیلکور اورناچ، رکشان ءُ پَنجگُور ءِ جنگاں دژمن تاوان داتگ۔
جارکش ءَ گوشتگ کہ شھید سنگت سئید اللہ پنام مھراج ء ادل جان واشک ءِ ھند راگے ءِ جاہ منند اِنت، 21 اپریل 2025 ءَ بی ایل اے ءَ ھوار بوتگ ءُ گوارگو ءُ پَنجگُور ءِ جنگاں گوں جوانمردی ءَ وتی توکل پیش داشتگ۔ شھید جھانزیب پنام کمبر ء بھرام پَنجگُور ءِ ھند نوک آباد، تسپ ءِ جاہ منند اِنت، آ جنوری 2025 ءَ بی ایل اے ءَ ھوار بوتگ ءُ راجی آجوئی جھد ءِ بھر بوتگ۔
آئی ءَ گوشتگ کہ شھید سنگت آمر پنام ھالد ء ڈاکٹر ابدُلوھید پنجگور ءِ ھند ھدابادان ءِ جاہ منند اِنت۔ آ 2022 ءَ بی ایل اے ءَ ھوار بوتگ ءُ شھری چیرجنگی ءَ پہ راجی آجوئی ءَ سرگرم بوتگ، 2024 ءَ کوہ ءَ شتگ۔ شھید سنگت سدام پنام شاویز ء التاپ کیچ ءِ ھند کلگ ءِ جاہ منند اِنت، آ 2025 ءَ بی ایل اے ءَ ھوار بوتگ ءُ یک جپاکشیں سرمچارے اَت۔
جارکش ءَ گوشتگ کہ شھید سنگت ابدوست ازیز ( ابدرھمان) پنام المان ء ملا ازگر تمپ ءِ ھند کوھاڈ ءِ جاہ منند اِنت، 2018 ءَ آجوئی ءِ سلاہ بندیں جھد ءَ ھوار بوتگ۔ 2019 ءَ بی ایل اے ءَ ھوار بوتگ۔ آ بی ایل اے ءِ پتھ اسکواڈ ءِ باسکے اَت ءُ چہ وتی جنگی بودناکیاں بنداتی لڑ ءَ بوتگ۔ سنگت ابدوست جھد ءِ یکشلیں چیدگ اَت، زورگریں پوج ءِ کمکاراں آئی ناکو مسدک ءِ شھیدی ءَ ھوار آئی کھول مچی سزا ءِ رد ءَ نشانگ کرتگ بلے آ چہ وتی لیکہ ءَ پدکنز نہ بوتگ۔ سنگت ابدوست آئی مات ءَ رودینتگ ءُ سکین داتگ کہ آ وت گوں آجوئی ءِ لیکہ ءَ ھمگرنچ بوتگ۔
جیئند بلوچ ءَ گوشتگ کہ گوں کشندہ ٹولی ءَ ھمگرنچیں مردماں موہ دے ایں کہ آ وتی بلوچ کشیں کاراں یل بہ کن اَنت ءُ سلاھاں چگل بدے اَنت، اگاں نہ آیانی بگیری ءَ بی ایل اے گوں ترندی ءَ کاروائی کنت ءُ آیاں گڈی آسر ءَ سر کنت۔
آئی ءَ گوشتگ کہ ترندیں ارشانی میان ءَ جھل مگسی ءَ زوگریں پوج ءَ لس مھلوک ءِ دیم ءَ دیگ ءِ جھد کرتگ، پمیشکا لس مھلوک وت ءَ چہ زورگریں پوج ءَ دور بدار ایت۔ مئے ترندیں ارش داں آجوئی ءُ وتواکیں بلوچستان ءِ گرگ ءَ گوں ترندی ءَ برجاہ بنت۔
بنشون: درشان اکس: زرمبش
