بلوچ نیشنل موومنٹ (بی این ایم )ءَ وتی درشانےءَ گوشتگ کہ جنیوا ءَ بی این ایم ءَ اکوام متھدہ ءِ انسانی ھکانی کونسل ءِ دیوان ءَ وتی سرگرمی بندات کرتگ اَنت داں 28 مارچ 2026 ءَ برجاہ بنت۔ اے درشانءَ بی این ایم یک ماھی میان اسمتانی مھم ءِ رد ءَ شنگ کنگ ءَ اِنت کہ ایشی مول بلوچستانءَ برجاھیں انسانی ھکانی بگیریانی دیم ءَ آرگ اِنت۔
آئیءَ گوشتگ کہ مرچی سلیم الاھی بلوچ ءَ کونسل ءَ تران کرتگ ءُ آئی کارکنے ءِ ھوری ءَ براتے ءِ بیگواھی ءُ دگہ براتےءِ کوش ءُ ڈاکٹر ماہ رنگ بلوچءَ ھوار بلوچ یکجھتی کمیٹی ءِ سروکانی یکشل ءَ درکانودی بندیگی ءِ سر ءَ بژن درشان کرتگ۔
آئیءَ گوشتتگ کہ من شمئے دیمءَ تھنا یک گواھے نہ بلکیں یک براتے ءِ بستار ءَ پیش بوگ ءَ آں منی مستریں برات زاھد بلوچ، بلوچ اسٹوڈنٹس آرگنائزیشنءِ پیشیگیں چیئرمین اِنت 18 مارچ 2014 ءَ پاکستانی پوج ءَ آوار جتگءُ بیگواہ کرتگ دوازدہ سال گوستگ بلے آ نہ آمیدگس ءَ پیش کنگ بوتگ ءُ نہ آئی بابت ءَ کھول ھال دیگ بوتگ۔ 15 مارچ 2025 ءَ منی دگہ یک مستریں براتے شاہ جان ءَ ریاستی کشندہ ٹولی ءِ کارمنداں چہ منی سیاسی کارانی بیر ءَ کشتگ۔ آپہ زانت کشگ بوتگ ایشی مول ھمیش اِنت کہ بلوچستانءَ کس ناھکیانی بگیری ءَ توار چست مہ کنت۔
آئیءَ گوشتگ کہ زور بیگواھیں مردمانی کھول بے گس کنگ ءُ آیانی گس ڈیرینگ ءُ مڈی دستیگ کنگ بوگ ءَ اَنت۔ اے درسیں گامگیجانی مول ھمیش اِنت کہ مردم بے توار بہ بنتءُ دانکہ پہ وتی آزیزاں توار چست مہ کن اَنت۔
سلیم الاھی ءَ گوشتگ کہ بلوچستان ءَ انسانی ھک گوں ترندی ءَ لگتمال بوگ ءَ اَنت۔ سیاسی ءُ انسانی ھکانی کارکن پہ زور بے توار کنگ بوگءَ اَنت۔ انسانی ھکانی کارکن ماہ رنگ بلوچ ءُبلوچ یکجھتی کمیٹیءِ آدگہ کارکن دروگیں کیساں بندیگ اَنت۔
آئیءَ گڈسر ءَ گوشتگ کہ من ھمے اوستءَ دار آں کہ اے کونسل گامگیج زور ایت ءُ پاکستانءَ زور دنت کہ آ بلوچستانءَ وتی در انسانی کاراں بند کنت۔
بنشون: درشان اکس: بی این ایم
