نیشنل ڈیموکریٹک پارٹی ءِ جارکش ءَ نواب ھیربکش مری ءِ سالروچ ءِ درگت ءَ ماں رسانکدر ءَ وتی شنگ کرتگیں درشانے ءَ گوشتگ که ما وتی ٹوھیں رھشون ، لیکھی استاد ءُ راجی گھگیری ءِ چیدگ ءَ ستک شانی ندر کن اِیں. نواب ھیربکش مری ھما وھد ءَ راجمستری راھبند ، راجی آجوئی ءُ پگری وتواجھی ءِ چیدگ جوڑ بیتگ که راستیں گپ ءِ کنگ ءُ ھک ءِ لوٹگ میارباری لیکگ بیتگ. آئی ءَ ھمک زوراکانی ته ءَ راھبند ، راستی ءُ راجی شرپ ءِ چراگ بالینتگ۔
جارکش ءَ گوشتگ که آئی ءَ وتی زند ءِ وهد ءَ راج ءِ زانشت ءِ مھکم کنگ ، ایردستی ءِ بگیری ءَ پگری دیوال ءِ جوڑ کنگ ءُ بلوچ ورناھانی گھگیری ، دیمونی ءُ دیمپانی ءِ در برگ ءِ گون ءَ گوازینتگ. آئی ءِ زند گوں بندیگجاه ، درانڈیھی ءُ آزارانی گون ءَ همگرنچ بیتگ ، بلے آئی کدی ھم ریاست ءُ کسانیں سیتّ ءُ نپانی دیم ءَ سر جھل نه کرتگ. آئی ءِ بے تواری ءِ ته ءَ انچیں توارے بیتگ که زورگریں ڈیھ چیلنج کرتگ اَنت۔ آئی ءِ لیکھی شرپ ءِ ته ءَ انچیں ترندی یے بیتگ که ایردستی رد کرتگ ءُ آئی ءِ زندان ءِ ته ءَ آجوئی ءِ یک نوکیں تاکے جوڑ بیتگ۔
آئی ءَ گوشتگ که نواب هیربکش مری بلوچ راجدوستی ءِ نوکیں زرمبشت ءِ بنجاھی کرد بیتگ. آئی ءَ راجدوستی چه ایوکیں اوگامے ءَ در کرتگ ءُ یک لیکھی ءُ کردی زرمبشتے جوڑ کرتگ. آئی ءِ واک ءِ در په وت ءَ بند کرتگ بلے په بلوچ ورناھاں زانشت ءِ دروازگ پچ کرتگ اَنت ، آئی ءِ لیکھ سیاسی واک ءَ ناں بلکیں دیمونی ءُ راھبندی راه بیتگ. آ بلوچ راج ءِ ھما پگر ءِ جوڑ کنوک بیتگ که سر جھلی ءِ جاه ءَ جنگ ئے گچین کرتگ۔
جارکش ءَ گوشتگ که این ڈی پی نواب ھیربکش مری ءِ سیاسی لیکھ ءَ وتی پگری رھشون سرپد بیت. چوشیں لیکھ چه توانمندی ءَ دور ءُ راستی ءَ نزیک ءَ اَنت ، ھما لیکھ که ریاستی نپاں رد کنت ءُ راجی لیکھ ءِ گون ءَ وپادار بیت. آ یک انچیں مردمے نه بیتگ بلکیں یک لیکھے ءِ بنیاد بیتگ. آئی ءِ ھمک کدم ، ھمک پیسله ءُ آئی ءِ بے تواریں تب اِے لیکھ ءِ شون اِنت که چه ریاست ءَ شری ءِ اوست دارگ نه بیت۔
این ڈی پی ءَ وتی درشان ءِ گڈی ءَ گوشتگ که مرچی ھمک باسمائیں بلوچ آئی ءِ لیکھ ءُ گھگیری دود ءِ پاسپان ءُ آئی ءِ وابانی مانا کنگ ءِ جھد ءَ برجاه دارگ اِنت ، آئی ءِ منزل ، لیکھ ءُ دلیری گوں این ڈی پی ءَ هوار راجی زرمبشت ءِ ھمک کارکنانی دل ءِ دریکگاں گوں ھوار اِنت ، نواب ھیربکش مری بس تھنا گوستانک ءِ یک بھرے نه اِنت بلکیں په آیوکیں وھد ءَ یک جست ءُ مئے جھد ءَ یک پسویے۔
