بلوچ یکجھتی کمیٹی ءَ وتی درشان ءَ گوشتگ کہ زوراکیانی رد ءَ پہ توار ءِ دارگ ءِپالیسی ءَ یک سالے سرجم بوگ ءَ اِنت۔بلوچ یکجھتی کمیٹی ءِسروک ڈاکٹر ماہ رنگ بلوچ، بیبگر بلوچ، سبگت اللہ شاہ جی، گل زادی بلوچ ءُ بیبو بلوچ ءِ زوریں بندیگ بوگ ءِ یک سالے سرجم بوگ ءِ درگت ءَ بلوچ یکجھتی کمیٹی چہ 20 پروری ءَ داں 20 مارچ ءَ سرپدی مھمےءِ برجم دارگ ءِجار ءَ جنت۔
آئیءَ گوشتگ کہ بلوچ سرڈگار ءِ سر ءَ برجاھیں زوراکی ھمک روچ یک نوک ءُ دردیگیں دروشمے پیش دار ایت۔ پہ اے زوراکیانی چیر دیگ ءُ سانمندیں مردمانی زھرشانی کنگ ءُ پہ پریاد ءِ بنکی ھکانی زبھر کنگ ءَ ریاستی ادارھاں زوراکیانی پالیسی یے برجاہ داشتگ۔ پاری 19 مارچ ءَ بلوچ یکجھتی کمیٹی ءِ بگیری ءَ زوراکی بندات کنگ بوتگ کہ آ داں مرچی ھم برجاہ اِنت۔
آئی ءَ گوشتگ کہ 19 مارچ2025 ءَ بگر داں مرچی 20 پروری 2026 ءَ ژانگولیں لاشانی دزکپگ، لشکرکشی، نشانگ کنگ، زوریں بیگواھی، پہ زور لڈینگ ءُ دروگیں میڑانی بلوچستانءَ یکشل ءَ ترسے برجاہ اِنت۔ ھمے جاوارانی پژدر ءَ بلوچ یکجھتی کمیٹی ءِ سروک یکشلءَ زندانی، مانزمانی ءِ دراجکش کنگ ءُ سیاسی کارانی سر ءَ پابندی جنگ ھمے زوراکی بھر گندگ بیت۔
آئی ءَ گوشتگ کہ اے مھم نہ تھنا بلوچ یکجھتی کمیٹی ءِ سروکانی زوریں دزگیری ءُدرکانودی بندیگی ءِ بگیری ءَ اِنت بلکیں بلوچستانءَ برجاھیں ھمک ھما کارپد ءَ پیش دارایت کہ چہ آئی ءِرد ءَ سیاسی کارکن نشانگ کنگ بوگءَ اِنت، اگاں آ زوریں بیگواھی بہ بیت یا پورتھ شیڈولءِرد ءَ پابندی بہ بنت یا مچی سزا ءِ گامگیج۔
آئی ءَ گوشتگ ما گوں درسیں سیاسی ءُانسانی ھکانی کارکنءُ باسمائیں بھرگ ءَ لوٹ کن ایں کہ آ اے مھم ءَ شریں وڑے ءَ بھر بزور اَنت، چی ءَ کہ پدریچ ءُ انساپ ءِ جھد یک مچی زمہ واری یے ءُ ایشی ھمک مردم ءَ کرد پیلو کنگ لوٹ ایت۔
بنشون: درشان اکس: مونوگرام
