بلوچ نیشنل موومنٹ ( بی این ایم ) ءِ کارگشاد دل مراد بلوچ ءَ گوشتگ کہ شھید ڈاکٹر منان بلوچ، نوروز بلوچ، اشرپ بلوچ، ھنیپ بلوچ ءُ ساجد بلوچ ءِ شھیدی ءَ بلوچ راجی زرمبشت ءِ تہ ءَ ھما جاہ کہ ھورک کرتگ، آ کدی ھم پر نہ بیت۔ اے مزن شانیں رھشون ءُ کارکنانی دیمونی بلوچ راجی گوستانک ءِ ھما در اَنت کہ آ پہ مدامی گیر آرگ بنت۔ آئی ءَ اے گپ نیدرلینڈز ءَ بوتگیں بی این ایم ءِ یک مراگشے ءَ جتگ اَنت۔
آئی ءَ گوشتگ کہ شھید بابو نوروز بلوچ یک دانشور ءُ لیکھی مردمے اَت، بابو نوروز ءِ وڑیں سنگتانی ودی بوگ ءَ کرن درکار بنت۔ آئی مارشت، جھد ءُ دیمونیاں بلوچ زرمبشت ءَ را یک مزنیں لیکھے بکش اِتگ۔ اے وڑیں مزن شانیں شھیدانی کمی نہ تھنا زرمبشت بلکیں پہ سرجمیں بلوچ راج ءَ مزنیں تاوانے، بلے آیانی کاروان، لیکہ ءُ جھد پہ آیوکیں پدریچاں مادنیں کشکے۔
آئی ءَ گوشتگ کہ اگاں ما مرچی یکجاہ این ءُ پہ بلوچ راجی زرمبشت ءَ کار کنگ ءَ ایں اے درس شھید منان جان ءِ دیمونیانی درچ اِنت۔ اے گران ءُ ناگیگیں جاورانی تہ ءَ مارا لیکھی توان، توکل ءُ دلبڈی رستگ گڑا اے ڈاکٹر منان بلوچ ءِ رھشونی، لیکہ ءُ جھدانی برورد اِنت۔ ڈاکٹر منان بلوچ ءَ نہ تھنا مارا زانت بکش اِتگ بلکیں دیمونی دیگ ءِ ھما مسال بوتگ کہ مرچی ھم پہ بلوچ راجی زرمبشت ءَ مادنیں کشکے اَنت۔
آئی ءَ گوشتگ کہ ڈاکٹر منان بلوچ ءِ شپ ءُ روچانی بے ھد جپاکشی، یکشلیں جھد ءُ کوشستانی برورد اِنت کہ مرچی بلوچ نیشنل موومنٹ جھان ءِ دیم ءَ یک مھکم ءُ سیاسی پارٹی یے ءِ بستار ءَ گندگ بیت۔
دل مراد بلوچ ءَ گوشتگ کہ ڈاکٹر منان جان یک انچیں دردوار ءُ بودناکیں مردمے اَت کہ آئی وتی سرجمیں زندگی پہ سیاست ءِ زانشتی گھتری، بلوچ چاگرد ءِ لیکھی دیمروئی ءُ سیاسی کارکنانی لیکھی ءُ کردی ھیلکاری ءَ ببا داتگ۔
آئی ءَ گوشتگ کہ نوں مئے سر ءَ پرز بیت کہ ما ڈاکٹر منان بلوچ ءُ آئی سنگتانی کاروان ءَ گوں ایمانداری، لیکھی مھکمی ءُ توکل ءَ دیم ءَ بہ بر ایں۔ مارا آیانی اے جھد، دیمونی ءُ لیکہ وتی زندمان ءِ بھر جوڑ کنگی اَنت ءُ بلوچ راجی زرمبشت ءَ یک انچیں زانشت، راھبند ءُ توکلے ءَ برجاہ بدار ایں کہ آئی بنیاد ھمایاں ایر کرتگ اَت۔ ھمے مزن شانیں رھشون ءُ شھیدانی ستک شانی ءُ ھمے مئے زمہ واری بیت۔
بنشون: درشان. اکس: دامگ
