بلوچ نیشنل موومنٹ ( بی این ایم ) ءِ چیئرمین ڈاکٹر نسیم بلوچ ءَ وتی درشان ءَ گوشتگ کہ پاکستان ءِ پیشیگیں نگران مزن وزیر انوار الھک کاکڑ ءُ بلوچستان ءِ انوگیں مزن وزیر سرپراز بگٹی چہ 15 ءُ داں 17 پروری ءَ پہ تر ءُ گردے ءَ ناروے ءِ شھر اسلو ءَ روگءَ اَنت۔ اودءَ آ گوں ناروے ءِ سرکار ءُ سیول سوسائٹی ءَ بلوچستانءِ جاورانی بابت ءَ گپ ءُ تران کن اَنت۔ اے تر ءُ گرد کسانیں سپارتکاری یے لیکگ مہ بیت۔
آئی ءَ گوشتگ کہ اے دوئیں مردم بلوچستان ءَ انسانی ھکانی گنتریں لگتمالیانی زمہ وار زانگ بنت، اے میارباریانی تہ ءَ زوریں بیگواھی، درکانودی کوش، مچی سزا ءُ ھمے وڑیں پالیسی ھوار اَنت کہ آ بلوچ، انسانی ھکانی پدجنوک ءُ میان استمانی تکءَ انسانیت ءِ بگیری ءَ میارباری چکچینی لیک اتگ اَنت۔
ڈاکٹر نسیم بلوچ ءَ گوشتگ کہ دگہ ھاسیں گپے ایش اِنت کہ آیانی گوں شپیک مینگل ءَ ھمگرنچی ءِ منانک دزکپتگ اَنت، کہ آ یک ریاستءِ نامداریں کشندہ ٹولی ءِ سروکے ءُ آئی ءَ پاکستانی پوج ءِ سروکی ءَ تچک ءَ کشندہ ٹولی برجاہ داشتگ۔
بی این ایم ءِ چیئرمین ءَ گوشتگ کہ شپیک مینگل ھما مردم اِنت کہ چہ توتک ءَ مچی کبراں 169 ءَ گیش مردم ءِ لاش دزکپگ ءِ میار بار اَنت۔ بلوچ شھری ءُ کارکنانی نشانگ کنگ،مھزبی ناشرکاریاں ھوار اِنت چہ ایشی آ شیہ مسلمان ءُ آیانی آبادت جاھانی سر ءَ وتکش ارش کنگ ءَ اوار انت۔
آئی ءَ گوشتگ کہ چہ اے وڑیں منانکانی دزکپگ ءَ ابید پاکستانءَ آ ھچ وڑ ءَ جست کنگ نہ بوتگ۔ اے وڑیں ناشریانی میارباری ءَ ھواریں مردم مرچی ھم یک سیاسی توان، پوجی سروکی ءُ میان استمانی تک ءَ تر ءُ گرد کنگ ءَ اِنت۔
ڈاکٹر نسیم بلوچ ءَ گوشتگ کہ ناروے دنیا ءِ تہ ءَ انسانی ھک، میان استمانی کانود ءُ پہ ایمنی رکینگءَ شرپدار ءُ نامدار اِنت، آ وتی سرڈگارءَ اے موکل مہ دنت کہ آئی سرڈگار زوراکیانی گار کنگ ءُ جنگی میارباریانی بے کسور کنگ ءَ کارمرز بہ بیت۔
آئی ءَ گوشتگ کہ ناورے سرکار، پارلیمنٹ ءِ باسک ، رسانکدر ءُ سیول سوسائٹی ءِ اکلاکی ءُ کانودی زمہ واری بیت کہ آ ایشاں بلوچستانءَ زوریں بیگواھی، مچی کبر ءُ درکانودی کوشانی بابت ءَ جست بہ کن اَنت۔ گوں کشندہ ٹولیءَ آیانی ھمگرنچی ءِ بابت ءَ جست بہ کن اَنت۔ اے ھم جست بہ کن اَنت کہ میارباراں چی ءَ کمک کن اَنت کہ آیاں سانمندیں کھول چہ راستی ءُ انساپ ءَ زبھر کرتگ۔
ڈاکٹر نسیم بلوچ ءَ گوشتگ کہ گوں سانمندیں بلوچ، زور بیگواھیں مردمانی کھول ءُ انسانی ھکانی پد جنوکاں رھوت کنگ بہ بنت۔ پہ سپارتکاری ءَ انسانی ھکانی لگتمالیانی سر ءَ بے توار بوگ نہ لوٹ ایت۔
آئی ءَ گوشتگ کہ پہ بلوچستان ءَ پندل سازیں گپ نہ بلکیں جست، میان استمانی نگرانی ءُ انساپ درکار اِنت۔ ناروےءَ گوستانکی راستی ءِ سر ءَ اوشتگی اِنت۔
بنشون: درشان اکس: رسانکدر
