پاکستانی پوج ءَ دوشی ھب چوکی ءَ بیڑ برتگ ءُ بلوچ نیشنل موومنٹ ( بی این ایم ) ءِ چیئرمین ڈاکٹر نسیم بلوچ ءِ پت مھمد بکش ساجدی، نئیم ساجدی ءُ رپیک بلوچ آوار جتگ ءُ بیگواہ کرتگ اَنت۔
بی این ایم ءِ انسانی ھکانی ادارہ پانک ءِ گوشگ اِنت کہ پاکستانی پوج ءَ دوشی ادار سے ءَ باز گس ءَ بیڑ برتگ ءُ ڈاکٹر نسیم بلوچ ءِ کھول آوار جتگ اَنت۔
اے بابت ءَ بلوچ نیشنل موومنٹ ( بی این ایم ) ءِ کارگشاد دل مراد بلوچ ءَ گوشتگ کہ سرپراز بگٹی ءَ مچی سزا ءِ جار ءَ پد زوت پارٹی ءِ چیئرمین ءِ پت ءُ آئی کھول زور بیگواہ کرتگ۔
آئی ءَ گوشتگ کہ چہ سالاں برجاھیں مچی سزا ءِ درچ ءَ دوشی وتگڑیں مزن وزیر سرپراز بگٹی ءِ نیمگ ءَ جار ءِ پژدر ءَ شپ ءَ ھب چوکی، لسبیلہ ءَ مئے پارٹی ءِ چیئرمین ڈاکٹر نسیم بلوچ ءِ پت مھمد بکش ساجدی، ناکو نئیم ساجدی ءُ ناکو مھمد رپیک ساجدی پاکستانی پوج ءَ چہ گس ءَ آوار جتگ ءُ بیگواہ کرتگ اَنت۔ اے انسانی شرپ، انسانی ھک ءُ شھریانی آجوئی ءِ سر ءَ تچکیں ارشے۔
دل مراد بلوچ ءَ گوشتگ کہ بلوچستان چہ دھکاں مچی سزا ءِ دیمپان اِنت۔ نوں کہ پاکستان ءِ داشتگیں وتگڑیں مزن وزیر ءِ نیمگ ءَ پہ مچی سزا ءِ گامگیج ءَ جار جنگ بوتگ، اے جار بلوچستان ءَ انسانی ھک ءُ بلوچ چکچینی ءَ ناگیگیں وڑے ءَ گیش کنت، بلوچ نیشنل موومنٹ یک سیاسی پارٹی یے، آئی چیئرمین پاکستانی پوج ءِ دست ءَ دوبر ءَ بیگواہ کنگ ءُ آزار دیستگ ءُ نیم دھکے ءَ گیش اِنت کہ پرانس ءَ درانڈیھی ءِ زند گوازینگ ءَ لاچار اِنت، بلے آ مچی سزا ءِ دیمپان کنگ بوتگ۔
آئی ءَ گوشتگ کہ بی این ایم ءِ لیکہ تچک اِنت کہ مئے منزل بلوچ سرڈگار ءِ آجوئی اِنت، ما چہ وتی مول ءَ یک گامے پشت ءَ نہ کنز ایں۔ مچی سزا ءِ جار ءِ پالیسی تچکیں ناشرکاری یے، اے الّم بلوچ ءَ تور ایت بلے پہ میان استمان ءِ زرد ءَ مزنیں جستے۔
