بلوچ اسٹوڈنٹس ایکشن کمیٹی ءِ جارکش ءَ گوشتگ کہ بلوچستان ءِ گوستانک گواہ اِنت کجام وھد ءَ ھک ءُ انساپ ءِ توار چست بوتگ گڑا سرکار ءَ پہ آئی دارگ ءَ زور کار گپتگ۔ بلوچستان ءِ انوگیں سرکار ءِ نیمگ ءَ بلوچستان گرینڈ الائنس ءِ لوٹانی پسو ءَ زوراکی کنگ سکا ناشری کارے۔ گل نہ تھنا اے پالیسی ءَ ایر جنت بلکیں آیانی گھگیری ءَ شرپ ءِ نگاہ ءَ چار ایت کہ آ گوستگیں چنچو ماہ اِنت زھرشانی کنگ ءَ اَنت۔ چہ آیانی گوش دارگ ءَ ابید پہ زور آیانی دارگ ءِ پیسلہ کنگ بوتگ۔
آئی ءَ گوشتگ کہ بلوچستان چہ وانگ ءَ پیسر ءَ تباہ اِنت، اود ءَ سی ءُ دو پروپیسر ءُ لیکچراراں ھوار زالبولیں استادانی ماٹو کنگ ءُ سروکانی دزگیری ھمے گپ ءَ پیش دار ایت کہ سرکار چہ زانت ءُ ند ءَ ترس ایت۔ سرکار چہ اے گپ ءِ جنگ ءَ دم نہ بر اَنت کہ پہ وانگ ءَ نوک نوکیں شریں گامگیج زورگ ءَ ایں۔ ھما دومی نیمگ ءَ استاداں ماٹو کن اَنت ءُ دزگیر کن اَنت کہ آیانی تہ ءَ پروپیسر ءُ لیکچرار ھوار اَنت۔
جارکش ءَ گوشتگ کہ بلوچستان گرینڈ الائنس ءِ ھکی ئیں لوٹ اَنت ءُ سرکار گوں آیاں رازیگ ھم بوتگ۔ نوں کہ لوٹانی پیلو کنگ ءِ وھد اتکگ گڑا سرکار ءُ آئی جھگیر وتی کولاں بج اتگ اَنت کہ اے سرکار ءِ سنگین نہ بوگ ءَ پیش دار ایت۔ما بلوچستان گرینڈ الائنس ءِ زھرشانی ءِ پلہ مرزی ءَ کن این ءُ ھمے سرپد بہ ایں کہ وانگجاہ ءِ بندی ءِ درسیں زمہ واری سوبائی سرکار ءِ سر ءَ اِنت۔ سیاسی سرگرمیانی سر ءَ پابندی ءُ آجوئی ءِ گپ ءِ دارگ ءِ اے پندل نوں دودے جوڑ بوتگ۔
آئی ءَ گوشتگ کہ گل نودربر ءُ استادانی سیادی ءَ جان ءُ ارواہ ءِ سیادی سرپد بیت۔ وتی استادانی کمشرپی ءُ پر ایمنیں زھرشانی کنوکانی سر ءَ زورچکاسگ ءَ بے توار نہ بہ ایں۔ ما گوں سرکار ءَ لوٹ کن ایں کہ آ پر ایمنیں زھرشانی کنوکانی لوٹاں گوش بدار اَنت۔
