بلوچ اسٹوڈنٹس ایکشن کمیٹی ءَ وتی درشان ءَ گوشتگ کہ گوستگیں روچاں بلوچستان سرکار ءِ جھگیرانی نیمگ ءَ شال ءَ یک پریس کانپرنسے ءَ گل ءِ بگیری ءَ وتگڑیں بھتا م جنگ بوتگ، اے نہ تھنا بے بنیاد اَنت بلکیں سرکار ءِ جھگیر ءِ بستار ءَ در زمہ واریں گامگیجے۔ چہ سرکار ءِ جھگیرانی نیمگ ءَ ابید پٹ ءُ پولءُ راستی ءِ زانگ ءَ اے وڑیں بے بنیں بھتام جنگ ءَ بژنیگ ایں۔ ما ھمے سرپد بہ ایں کہ اے وڑیں بے بنیادیں پندل سازی تھنا بلوچ نودربرانی چہ وانگ ءِ ھک ءُ زانشت ءَ دور کنگ ءِ بے سوبیں جھدے۔
آئی ءَ گوشتگ کہ بساک بلوچستان ءِ پہ زانشت ءُ وانگی ھک ءُ چاگردی گھتری ءَ کار کنوکیں گلے۔ آئی مول بلوچستان ءَ ورنایانی وانگ ءِ نیمگ ءَ دلگوش دیگ ءُ بلوچ چاگرد ءَ زانشتی ءُ دودمانی کارانی رد ءَ جوانیں چاگردے بہ ٹھین ایت دانکہ بلوچ ورنا چہ نوکیں دور ءِ زانشت ءَ ھیل بہ کن اَنت ءُ پدریچ وانندگ بہ بیت۔
جارکش ءَ گوشتگ کہ بلوچستان پیسر ءَ چہ وانگ ءَ پد منتگ ءُ پہ وانگ ءَ تباہ اِنت، اود ءَ پہ زانشتی گھتری ءَ کار کنوکیں نودربر ترسینگ بنت ءُ چہ آدگہ پندلانی پارست ءَ ترسینگ بنت دانکہ آ چہ وانگی ءُ انسانی ھکاں دز کش بہ بنت۔
آئی ءَ گوشتگ کہ ما ھمے سرپد بہ ایں بلوچ ورنا پمشکا ترسینگ بنت کہ آ وان اَنت گڑا جست کن اَنت، شرگداری کن اَنت ءُ پہ وتی چاگرد ءِ گھتری ءَ کار کن اَنت۔ اے نزام ءِ تہ ءَ جست ءُ شرگداری کنگ میارے جوڑ بوتگ۔ بلے بلوچ ورنا چہ وتی وانگ، شرگداری کنگ ءُ ھکی ئیں جھد ءَ ھچ وڑ ءَ دزکش نہ بنت۔
آئی ءَ گوشتگ کہ ما رسانکدر ءِ پارست ءَ تچک ءَ گوش ایں کہ بساک گوں درکانودی ھچ وڑیں کاراں ھوار نہ اِنت بلکیں آئین ءِ رد ءَ جھد کنگ ءَ اِنت ءُ مئے جھد پدر اِنت۔ سرکاری جھگیر وتسریں بھتام جنگ ءَ بند بہ کن اَنت ءُ سنگین بہ بنت، بلوچستان ءَ پہ جمھوری ءُ پر ایمنیں کاراں وتی کرد ءَ پیلو بہ کن اَنت۔
