بلوچ نیشنل موومنٹ ( بی این ایم ) ءَ وتی شنگ کرتگیں درشانے ءَ گوشتگ کہ شبیر بلوچ یک نودربر سروکے 4 اکتوبر 2016 ءَ چہ گورکوپ ءَ پاکستانی پوج ءَ آوار جتگ ءُ بیگواہ کرتگ۔ آئی زوریں بیگواھی ءَ نُھ سال سرجم اِنت کہ بلے آئی زندگی ءُ سلامتی ءِ بابت ءَ ھچ وڑیں سرپدی دیگ نہ بیتگ کہ آ داں مرچی بندیگجاہ ءَ آزارانی دیمپان اِنت۔
آئی ءَ گوشتگ کہ شبیر ءِ کھول بزاں آئی گھار سیما بلوچ ءُ لوگبانک زرینہ بلوچ پہ آئی آجوئی ءَ یکشل ءَ جھد کنگ ءَ اَنت۔ آ پاکستان ءِ پہ زور بیگواھیں مردماں جوڑ کنگ بیتگیں کمیشن ءَ شتگ ءُ کیس یاداشت کرتگ ءُ کانود ءِ رد ءَ ھر پیمیں جھد کرتگ، چہ اے درسیں جھداں ابید آیاں پہ شبیر ءِ بابت ءَ ھچ وڑیں ھال نہ رستگ۔ رنج آماچیں زرینہ گریوگ ءُ ھمے گوشگ ءَ اِنت کہ من ءَ ھال بدے اِت من شبیرءِ لوگبانک آں یا جنوزام آں۔
آئی ءَ گوشتگ کہ مرچی آئی کھول کیچ ءِ شھر تربت ءَ زھرشانی کنگ ءُ انساپ ءِ لوٹ ءَ کنگ ءَاِنت۔ پاکستانی پوج ءَ شبیر بلوچ ءِ کھول مدام ترسینتگ ءُ پہ بے توار بوگ ءَ بیھار ھم داتگ۔ کراچیءَ یک زھرشانی یے ءِ میان ءَ پولیس ءَ آئی باز مردم دزگیر کرتگ اَت۔
آئی ءَ گوشتگ کہ شبیر بلوچ ءِ زوریں بیگواھی نُھ سال سرجم بوگ ءَ ابید آئی کھول انگت ءَ ھم مھکم اِنت ءُ وتی جھد برجاہ داشتگ۔ اے درد ءَ تھنا ھما مردم سرپد بنت کہ آیانی آزیز بیگواہ کنگ بیتگ اَنت۔
آئی ءَ گوشتگ کہ بلوچ نیشنل موومنٹ ( بی این ایم ) شبیر بلوچ ءِ زوتیں آجوئی ءُ بلوچستان ءَ زوریں بیگواھیانی بند کنگ ءِ لوٹ ءَ کنت۔
