شال ءِ ھند کمبرانی ءِ جاہ منند سمروش بلوچ ءَ گوں وتی کھول ءِ آدگہ مردماں شال پریس کلب ءَ پرنس کانپرنس کرتگ ءُ گوشتگ کہ پاکستانی پوج ءَ لھتیں ماہ پیش مئے شش کسان سالیں زھگ آوار جتگ ءُ بیگواہ کرتگ۔ مارا آیانی بابت ءَ ھچ سرپدی دیگ ءَ نہ اَنت کہ آ چون ءُ کج ءَ اَنت۔ ما ھمے لوٹ ءَ کن ایں کہ مئے گسانی سر ءَ ھمک روچ بیڑ برگ بند کنگ بہ بیت ءُ کسان سالیں نودربر آجو کنگ بہ بنت۔
آئی ءَ گوشتگ کہ گوستگیں چنچو سال اِنت ما ریاستی زوراکیانی آماچ ایں۔ ابید ھال دیگ ءَ مئے گسانی سر ءَ بیڑ برگ ءَ اَنت ءُ مئے واب اِش ھراب کرتگ۔ مئے ورنایاں آوار جنگ ءُ داں ماھانی ماہ بیگواھی ءَ پد یل کنگ ءَ اَنت۔ چہ ایشی ما سکا جنجال ایں۔
آئی ءِ گوشگ اِنت کہ لھتیں ماہ پیش منی ناکو پزل الرھمان کمبرانی ءُ ناکو زیا الرھمان کمبرانی دومی بر ءَ زور بیگواہ کنگ بوتگ اَنت ءُ پد ءَ یل کنگ بوتگ اَنت۔ نوں شش دسمبر ءِ شپ ءَ نُھ ءَ داں یک ءَ مئے ھند ءَ لشکرکشی ءِ میان ءَ گس درکانودی پٹ ءُ پول کنگ بوتگ اَنت۔
کھول ءَ گوشتگ کہ یکشل ءَ چہ بیڑ برگ ءُ پٹ ءُ پولانی میان ءَ اکتوبر ءَ چہ مئے گساں شش زھگ ھیربیار بلوچ، اپزل بلوچ، بیبرگ کمبرانی، نورمھمد، ھمل کمبرانی کہ کسان سالیں نودربر اَنت بیگواہ کنگ بوتگ اَنت۔
آئی ءَ گوشتگ کہ ما ھمے لوٹ ءَ کن ایں کہ کسان سالیں نودربر زوت یل کنگ بہ بنت ءُ ھمک روچ گسانی سر ءَ بیڑ برگ بند کنگ بہ بیت۔
