بلوچ اسٹوڈنٹس آرگنائزیشن آزاد ءِ جارکش ءَ وتی شنگ کرتگیں درشانے ءَ گوشتگ کہ بلوچ راجی گوستانک ءِ تاکدیماں نبشتگیں در ھمے گپ ءِ منانک اَنت کہ بلوچ راج ءَ ھمک دھر ءَ زورگریں ارش کنوکانی بگیری ءَ گھگیری کرتگ ءُ وتی سرڈگار پھریز اتگ۔ اے دمگ ءَ چہ انگریز ءَ بگر داں پاکستان ءِ وڑیں زورگر ءِ بگیری ءَ بلوچ راج ءَ چہ بنداتی روچ ءَ گھگیری کرتگ ءُ وتی آجوئی ءُ شرپ زندگ داشتگ ءُ راجی زمہ واری پیلو کرتگ اَنت۔ اے روایت ءِ برجاہ دارگ ءَ 1967 ءَ کوہِ سلیمان ءِ نہ ترسیں مھلوک ءَ زورگریں ریاست ءِ بگیری ءَ گھگیری ءِ نوکیں گوستانکے زندگ داشتگ۔
آئی ءَ گوشتگ کہ بلوچستان ءِ سرڈگار انگریز زورگر ءَ چہ وتی زورگری پالیسی ءُ دروگیں کولانی رد ءَ پاکستان، ایران ءُ اوگانستان ءَ بھر ءُ بانگ کرتگ۔ چہ بلوچستان ءِ آجوئی ءَ پد زورگریں پاکستان ءَ گوں توپک ءُ پندلانی بنیاد ءَ سرڈگار دستیگ کرتگ گڑا ھمے پالیسی برجاہ داشتگ اَنت ءُ پاکستان ءَ بلوچستان ءِ بازیں ھند چہ دروگیں کول ءُ زور ءَ بھر ءُ بانگ کرتگ ءُ گوں آدگہ استاناں ھوار کرتگ اَنت۔
آئی ءَ گوشتگ کہ 1967 ءَ وھدے زورگریں پاکستان ءَ ڈیرہ جات ءِ ٹکی ھنداں زوراکی بندات کرتگ گڑا کوہِ سلیمان ءِ شرپمندیں مھلوک ءَ چہ سر جھل کنگ ءِ جاہ ءَ گھگیری کرتگ۔ ڈیرہ جات ءِ جاہ منندیں بلوچ راج ءَ اے زوراکی ءِ بگیری ءَ گھگیری کرتگ نہ تھنا زورگری نہ منّ اتگ بلکیں پہ وتی سرڈگار ءِ دیمپانی ءَ مڑ اتگ ءُ شھید بوتگ اَنت۔
آئی ءَ گوشتگ کہ زورگریں پاکستان ریاست ءِ بگیری ءَ پہ بلوچ سرڈگار ءِ دیمپانی ءَ شھید بوتگیں کوہِ سلیمان ءِ بلوچ پسگانی ستک شانی ندر کنگ ءِ گھتریں وڑ ھمیش اِنت کہ آیانی مول ءِ ھساب ءَ چہ بلوچ سرڈگار ءَ زورگریں ریاست ءِ پہ کشگ ءَ جھد ءُ گھگیری ءِ راہ گچین کنگی اِنت چی ءَ کہ آ گرانبھائیں کرداں بلوچ رویتانی پاسداری کرتگ مھراب ھان ءِ لیکہ ءِ سر ءَ وتی جانانی دیمونی داتگ۔ ڈیرہ جات ءِ مھلوک ءَ اے لیکہ سرپد بوگی اِنت ءُ مرچیگیں دور ءَ راجی ایردستی ءِ بگیری ءَ جھد کنگ راج ءُ وھد ءِ لوٹ اِنت۔
