بلوچ یکجھتی کمیٹی ءِ سروک ڈاکٹر ماہ رنگ بلوچ ءَ وتی شنگ کرتگیں درشانے ءَ گوشتگ کہ من ایمان مزاری ءُ ھادی الی چٹھہ ءِ گون ءَ انساپ، انسانی ھک ءُ ھمک انسان ءِ شرپ ءِ جھد ءَ یکجاھی ءِ ھواری ءَ ھمکوپگ آں۔ آئی ءَ ھمت ءُ جھد ءِ سر ءَ بے توار بوگی نہ اِنت۔
آئی ءَ گوشتگ کہ آجوئی ءِ وڑیں لیکھانی درشان کنگ بنکی ھک چہ آیاں پچگرگ بیتگ، ھمے وڑ ریاستی ادارھانی نیمگ ءَ بیوکیں زوراکیانی پُرکنگ ءَ ابید نوآبادکاری وھد ءِ کانود پہ باسکانی بے توار کنگ ءَ کارمرز بوگ ءَ انت۔
ڈاکٹر ماہ رنگ بلوچ ءَ گوشتگ کہ چہ بازیں سالاں ایمان ءُ ھادی انسانی ھکانی پدجنگ ءَ چہ درستاں دیم ءَ اَنت- چیرتر اِتکگیں تواراں دیم ءَ آرگ ءَ اَنت ءُ ھر پیمیں نا ھکی ءُ زوراکیانی بگیری ءَ توار چِست کنگ ءَ اَنت- آیانی بگیری ءَ وتگڑیں ارزی، ریاست ءِ زوراکیاں پاشک کنت- اے گپ ھمے راستی ءَ پدر کنت کہ انساپ ءِ نزام کجام کساس ءَ ھما مردمانی بگیری ءَ کارمرز کنگ بیت کہ انسانی بنکی ھکانی پھریزگ ءِ جھد ءَ کنگ ءَ اَنت۔
آئی ءَ گوشتگ کہ من میان اُستمانی تک ءَ گوں ترندی ءَ گوش آں کہ پہ ایمان ءُ ھادی ءِ پھریزگ ءَ دلجمی دیگ بہ بیت ءُ آیانی سر ءَ جتگیں درسیں بے بنیں بھتام سرجم ءَ ھلاس کنگ بہ بنت ءُ کیسانی پہ دلجمی ءِ پٹ ءُ پول ءِ لوٹ ءَ کن ایں۔ کانود ءِ پہ زوراکی ءَ کارمرز کنگ ھلاس کنگ ءُ انساپ کنگ لوٹ ایت۔
