بلوچ نیشنل موومنٹ ( بی این ایم ) ءِ چیئرمین ڈاکٹر نسیم بلوچ ءَ وتی شنگ کرتگیں درشانے ءَ گوشتگ کہ پانزدہ سالیگیں نسرینہ بلوچ چہ بلوچستان ءِ شھر ھب ءَ پاکستانی پوجءِ دست ءَ آوار جنگ بیتگ ءُ ایشی پوج ءِ چیردستی ءَ زوریں بیگواھی ءِ لڑا دگہ یک بلوچ جنکے ءِ زوریں بیگواھی گیش کرتگ۔
آئی ءَ گوشتگ کہ نسرینہ ءِ وڑیں زھگ باید انت اکلاکی، دودمانیءُ میان استمانی راھبندانی رد ءَ پھریزگ بہ بنت، بلے بلوچستان زورگپت اِنت ءُ چہ ریاستی زوراکیاں زھگ ھم پھریز نہ اَنت۔
ڈاکٹر نسیم بلوچ ءَ گوشتگ کہ اے ویل یک انچائیں یا مردمے ءِ نہ اِنت بلکیں یک انچیں مھکمیں شوربندی یے ءِ درچ اِنت کہ آئی مول بلوچ چاگرد ءِ ترس آماچ کنگ اِنتءُ یک آجوئیءِ جھد کنوکیں راجے ءِ توکل ءِ پروشگ اِنت۔
آئی ءَ گوشتگ کہ پاکستانی ریاستءَ بلوچستانءَ را یک انچیں جنگ آماچیں دمگے جوڑ کرتگ کہ اود ءَ جنین،جنک، کماش ءُ داں کسانیں زھگ ھم پھریز نہ اَنت۔
ڈاکٹر نسیم بلوچ ءَ گوشتگ کہ ھمک زور بیگواھی مئے توکل ءُ ارادہ ءَ گیش مھکم کنت۔ نسرینہ ءِ وڑیں زھگانی بیگواھی ھمے گپ ءِ منانک اِنت کہ بلوچ راج انساپ نہ آجوئی لوٹ ایت۔
آئیءَگوشتگ کہ آ نزام کہ زوراکی کنگ ءَ اِنت ما چہ آئی ءَ انساپ ءِ لوٹ ءَ نہ کن ایں بلکیں ما زورگپتی ءِھلاس کنگ ءِلوٹ ءَ کن ایں۔
ڈاکٹر نسیم بلوچ ءَ گوشتگ کہ پہ نسرینہ بلوچ ءَ چہ بلوچستان ءَ ڈن ھم توار چست کنگ لوٹ ایت دانکہ جھان بہ زانت پاکستان سرکار گوں بلوچانی زندگی ءَ چے کنگ ءَ اِنت۔
آئی ءَ گوشتگ کہ آجوئی ھما چیز اِنت مارا ھمے سدکی ءَ دنت آھوکیں وھداں بلوچ جنک شپانی تھاریاں پوجیانی دست ءَ آوار جنگ نہ بنت۔
نسرینہ بلوچ نہ تھنا ریاستی زوراکیانی آماچ اِنت بلکیں ھما جھد ءِ منانک اِنت کہ چہ ایشی بلوچ راج سرجھل نہ کنت۔
