گْوادر ءِ ھند پسنی ءَ پاکستانی پوج ءَ آسپ مراد نامیں مردمے آوار جنگ ءَ پد بیگواہ کرتگ۔
زرمبش جھگیر ءِ رد ءَ زور بیگواھیں آسپ ھاسل پسنی، وارڈ نمبر یک ءِ جاہ منند اِنت کہ دوشی ادار یک ءَ پاکستانی پوج ءَ آئی گس ءَ بیڑ برتگ ءُ گس پٹ ءُ پول کرتگ اَنت۔ آسپ گس ءَ ساڑی نہ بیتگ۔
مرچی بیگاہ ءِ ھپت ءَ پاکستانی پوج ءَ چہ پَسِنی ءِ چوکی ءَ آوار جتگ ءُ بیگواہ کرتگ۔
آئی زوریں بیگواھی ءِ بابت ءَ کھول ءِ گوشگ اِنت کہ دوشی پوج ءَ گس ءَ بیڑ برگ ءِ میان ءَ مردمانی موبائل ھم پل اِتگ ءُ برتگ اَنت۔
آئی ءَ گوں انسانی ھکانی ادارھاں لوٹ کرتگ کہ پہ آسپ ھاسل ءِ آجوئی ءَ توار چست بہ کن اِت۔
