شال: زور بیگواھیں الی ازگر ءِ زھگ گلام پاروک چہ وی بی ایم پی ءِ زھرشانی گدان ءَ پریس کانپرنس کرتگ ءُ گوشتگ کہ منی پت الی ازگر یک سیاسی کارکنے بیتگ کہ آ بندات ءَ 2000 ءَ ریاستی ادارھاں چہ شاھوانی دگ ءَ آوار جتگ ءُ چاردہ روچ ءَ پد آجوبیتگ۔ دومی بر ءَ 18 اکتوبر 2001 ءَ گوں مھمد اکبال ءَ چہ شال ءِ ڈگری کالج ءِ دیم ءَ آوار جنگ ءُ بیگواہ کنگ بیتگ، اکبال 24 روچ ءَ پد یل کنگ بیتگ بلے منی پت انگت ءَ ریاستی ادارھانی کِر ءَ بندیگ اِنت ءُ آئی بیگواھی ءَ 24 سال سرجم بیتگ۔
آئی ءَ گوشتگ کہ ما اے بیست ءُ چار سالانی میان ءَ پہ وتی پت ءَ آجوئی ءَ درسیں در ٹک اتگ اَنت ءُ گوں ایشی ءَھوار پر ایمنیں جھد کرتگ، بلے بژن اِنت کہ مارا ھچ جاہ ءَ کانود ءِ رد ءَ انساپ دیگ نہ بیتگ ءُ اے پہ درسیں ادارھانی کرد ءَ یک جستے ودی کنت۔
گلام پاروک ءَ گوشتگ کہ چہ پت ءِ زوریں بیگواھی ءَ انچو سال ءِ گوزگ ءَ مئے سرجمیں کھول سسائی نادراہ جوڑ بیتگ ءُ ما مالی جنجالانی دیمپان بیتگ ایں، مئے گھار ءُ براتانی وانگ ھم سرجم نہ بیتگ ءُ مئے زندمان جنجال اِنت۔
آئی ءَ گوشتگ کہ ما یکبرے پد ءَ چہ شمئے رد ءَ گوں ریاستی داراھانی سروک ءُ سرکار ءَ ھمے لوٹ ءَ کن ایں کہ مارا چہ پت ءِ زوریں بیگواھی ءِ رنج ءَ آجو بہ کن اِت، اگاں مئے پت زندگ اِنت گڑا آئی زوت آجو بہ کن اِت ، اگاں آ زندگ نہ اِنت گڑا آئی بابت ءَ مارا سرپد بہ کن اِت دانکہ مئے کھول چہ اے رنجاں آجو بہ بیت۔
گلام پاروک ءَ گوشتگ کہ من گڈی ءَ ھمے لوٹ ءَ کن آں کہ زوربیگواھیں مردمانی کشگ ءِ درچ زوت بند کنگ بہ بیتءُ درسیں بیگواھیں مردم آجو کنگ بہ بنت۔
