بلوچ نیشنل موومنٹ ( بی این ایم ) ءِ انسانی ھکانی ادارہ پانک ءَ پاکستانی پوج ءِ دست ءَ زور بیگواھیں ورنا تلال اھمد ءِ کوش ایر جتگ ءُ گوشتگ کہ تلال اھمد بلیدہ ءِ میتگ کوشک ءِ جاہ اِنت آئی امر بیست ءُ دو سال اِنت ءُ یک ڈرائیورے۔ پاکستانی پوج ءَ 14 اگست 2025 ءَ چہ بلیدہ ءِ پٹ بال گراونڈ ءَ آوار جتگ ءُ بیگواہ کرتگ۔
آئی ءَ گوشتگ کہ چہ چل روچ ءِ زوریں بیگواھی ءَ پد 23 ستمبر 2025 ءَ آئی ژانگولیں لاش چہ بلیدہ الندور ءَ گوں میراج بلوچ ءَ ھوار دست کپتگ۔
آئی ءَ گوشتگ کہ تلال اھمد چہ پجار کارڈ ءَ پجارگ بیتگ۔ آئی جان ءَ ٹپ ھم بیتگ کہ چہ ایشی ءَ ھمے زانگ بیت کہ آ آزار دیگ بیتگ ءُ پد ءَ کشگ ءُ لاش چگل دیگ بیتگ۔
پانک ءَ گوشتگ کہ اے ویل بلوچستان ءَ زوریں بیگواھی ءُ درکانودی کوشانی دگہ یک دردناکیں درچے پیش دار ایت۔
