بلوچ نیشنل موومنٹ ( بی این ایم ) ءِ انسانی ھکانی ادارہ پانک ءَ بلوچستان ءَ انوگیں انسانی ھکانی لگتمالی گوں ترندیں دانکاں ایر جتگ اَنت ءُ گوشتگ کہ 20 مارچ ءِ سھب ءَ پاکستانی لشکر ءَ بلوچ یکجھتی کمیٹی ءِ کلانھیں باسک بیبرگ بلوچ ءِ گس ءَ بیڑ برتگ ءُ آ گوں کستریں برات ڈاکٹر ھمل زھری ءَ زور بیگواہ کرتگ۔ بیبرگ بلوچ جان سلامتیں مردمے نہ اِنت ءُ بلوچ یکجھتی کمیٹی ءِ پرکاریں باسکے اِنت کہ آ پہ بلوچستان ءِ انسانی ھکانی بگیری ءَ گوں ترندی ءَ توار چست کنگ ءَ بیتگ۔
آئی ءَ گوشتگ کہ ھمے وڑ ءَ شال ءَ بولان میڈیکل کالج ءِ وائس پرنسپل ڈاکٹر الیاس بلوچ زور بیگواہ کنگ ءُ چیریں جاھے ءَ برگ بیتگ کہ پاکستانی لشکر ءِ زوراکیانی شوندات ءِ درچ اِنت ءُ ایشی ایر جن ایں۔
آئی ءَ گوشتگ کہ بلوچستان ءَ زوریں بیگواھی تیوک ءَ یک سیاسی جیڑھے نہ اِنت بلکیں انسانی ھکانی ناھکیں بگیری اِنت، ایشی مول لس بلوچانی ترسینگ ءُ آیانی توار ءِ دارگ ءُ بلوچستان ءَ برجاھیں زوراکیانی بگیری ءَ گھگیری ءِ بے توار کنگ اِنت۔
آئی ءَ درشان ءَ دیمتر ءَ گوشتگ کہ پاکستان ءِ لشکری ادارہ نہ چونیں ھم مردمے ءِ کار ءَ چار اَنت ءُ نہ آئی چاگردی کارانی ھیال ءَ دار اَنت بلکیں ھمک بھرگاں سیادی داروکیں مردماں زور بیگواہ کن اَنت۔
آئی ءَ گوشتگ کہ چہ ایشی پیش ھم بازیں ڈاکٹر، استاد، نودربرءُ آدگہ بھرگاں سیادی داروکیں مردم زور بیگواہ کنگ بیتگ اَنت۔ چنچو مردمانی ژانگولیں لاش دزکپتگ اَنت اے سکا بژنی گپے ءُ ایشی ایر جن ایں۔
پانک ءَ وتی درشان ءِ گڈی ءَ گوں میان استمانی تک، اکوام متھدہ، ایمنسٹی انٹر نیشنل، میان استمانی انساپ ءِ آمیدگس ءُ گوں آدگہ انسانی ھکانی گلاں لوٹ کرتگ کہ بلوچستان ءَ برجاھیں ریاستی زوراکی ءُ انسانی ھکانی لگتمالیانی سر ءَ دلگوش ءَ گور بہ کن اَنت ءُ پاکستان ءَ جست بگر اَنت ءُ بلوچاں چہ زوراکیاں بہ رکین اَنت۔
آئی ءَ گڈی ءَ گوشتگ کہ پانک بلوچانی سر ءَ بیوکیں زوراکیانی بگیری ءَ وتی جھد ءَ برجاہ دار ایت۔
