بلوچ وومن پورم ءِ سروک ڈاکٹر شلی بلوچ ءَ وتی شنگ کرتگیں درشانے ءَ گوشتگ کہ دالبندین شھر ءَ پاکستانی پوج ءِ ارش ءَ بی ایس او پجار ءِ گوستگیں چیئرمین زبیر بلوچ ءُ نسار بلوچ ءِ کوش ءُ لسبیلہ یونیورسٹی ءَ زھرشانی کنوکیں نودربرانی سر ءَ انتزامیہ ءُ پولیس ءِ اُرش بلوچ ورنایانی چہ وانگ ءُ سیاست ءَ دور دارگ ءِ پندلے۔
آئی ءَ گوشتگ کہ دالبندین ءِ شھر ءَ پاکستانی پوج ءَ بیڑ برتگ ءُ بی ایس او پجار ءِ گوستگیں چیئرمین زبیر بلوچ ءُ نسار بلوچ شھید کرتگ اَنت اے پہ بلوچ راج ءَ سکا بدیں ھالے۔ ایشی چنچو ایر بجن ئے کم اِنت۔
ڈاکٹر شلی بلوچ ءَ گوشتگ کہ استان ءِ پوج ھمے سرپد بیت کہ چہ زانتکاریں سرانی کشگ ءُ بیگواہ کنگ ءَ بلوچ راج ترس آماچ بیت ءُ پہ وتی ھکانی جھد ءَ دزکش بیت اے آئی نابزانتی اِنت۔ ھک ءُ راستی ءِ توار پہ کشگ ءُ بیگواہ کنگ ءَ دارگ نہ بیت اے زوراکی بلوچستان ءَ چہ بازیں دھکاں برجاہ اِنت۔ زبیر بلوچ وتی بلوچ راج ءِ ھکانی مھکیں توارے بوتگ۔ آ ھمک وھد ءَ استان ءِ پوج ءِ دست ءَ ورنا ءُ نودربرانی بیگواھی ءُ کوش بہ بنت یا نودربرانی جیڑہ آئی ءَ بلوچ ءِ سر ءَ زوراکی نہ من اِتگ۔
آئی ءَ گوشتگ کہ بلوچستان ءَ زبیر بلوچ ءِ وڑیں باز ورنا بیگواہ ءُ کشگ بوتگ، بلے اے جھد ءِ درچ نزور نہ بوتگ گیشتر مھکم بوتگ ءُ برجاہ اِنت۔ زبیر بلوچ ءِ کوش ھمے درچ ءِ بھرے، ریاست ءَ وتی بلوچ کشیں پالیسی ھلاس کنگ لوٹ ایت چہ انچو ورنا ءُ زانتکاریں سرانی کشگ ءُ بیگواہ کنگ ءَ اے جھد نہ اوشتاتگ دیم ءَ ھم نہ اوشت ایت۔
ڈاکٹر شلی بلوچ ءَ گوشتگ کہ ھمے ھساب ءَ اوتل ءَ لسبیلہ یونیورسٹی ءَ نودربر پہ وتی ھکاں زھرشانی ءَ بوتگ اَنت کہ یونیورسٹی ءِ انتزامیہ ءُ پولیس ءَ آیانی سر ءَ بیڑ برتگ ءُ نودربر، لٹ داتگ اَنت باز دزگیر کتگ نودربرانی سر ءَ انچو تیرگواری کتگ کہ یک پوجے ملک دژمنیں مردمانی سر ءَ تیرگواری بہ کنت۔
آئی ءَ گوشتگ کہ زیکیں روچ ءَ پد ماں پد ءَ دوئیں ویل ھمے چیز ءَ پیش دار اَنت کہ استانی پوج چہ بلوچ ءِ باسمائیں ءُ سیاست ءَ ترس ءِآماچ اِنت۔ بلوچستان ءَ پہ ھکاں توار چست کنگ ءِ جاہ ءَ تیر اِنت، ژانگولیں لاش اِنت، بیگواھی ءُ زندانی اِنت۔ما نوں ریاست ءَ ھمے گوشگ لوٹ ایں کہ گوں بلوچ ءَ زوراکی ءَ بس کن، پہ زور ءَ بلوچ دارگ بوتیں اَنت آ وھد ءَ دیر اَت۔
ڈاکٹر شلی بلوچ ءَ گوشتگ کہ من وتی بلوچ راج ءُ راج ءِ ورنایاں گوش آں کہ اے زُوراکیانی بگیری ءَ بے توار بوگی نہ اِنت، اگاں بلوچ توار چست کنت یا بے توار بیت بلے استانی کارمندانی دست ءَ کشگ بیت۔
