شال: پاکستانی پوج ءِ دست ءَ مھر گل مری زوریں بیگواھی ءِ دہ سال سرجم بوگ ءِ درگت ءَ شال پریس کلب ءِ دیم ءَ زھرشانی کنگ بوتگ۔ زھرشانی ءَ وائس پار بلوچ مسنگ پرسن ءِ چیئرمین نسر اللہ بلوچ ءَ ھوار اھوالکار ءُ جتائیں بھرگاں سیادی داروکیں مردماں بھر زرتگ۔
زھرشانی کنوکیں مردماں بھر گل مری ءِ اکس ءُ پلے کارڈ دستاں بیتگ اَنت کہ آیاں مھر گل مری ءَ ھوار پہ درسیں بیگواھیں مردمانی آجوئی ءُ زوریں بیگواھیانی بند کنگ ءَ اوگام جتگ۔
زھرشانی ءَ نسر اللہ بلوچ ءَ تران کرتگ ءُ گوشتگ کہ مھر گل مری ءَ دہ سال پیش چہ سریاب ءَ ریاستی ادارھاں آوار جتگ ءُ بیگواہ کرتگ۔ پہ آئی آجوئی ءَ کھول پہ زوریں بیگواھی ءَ جوڑ بیتگیں کمشن ءَ ھوار کراچی ءُ اسلام آباد ءَ ھم زھرشانیاں ھوار بیتگ ءُ درسیں در ٹک اِتگ اَنت کہ اگاں مھر گل مری ءِ سر ءَ چونیں ھم بھتامے ھست گڑا آمیدگس ءَ پیش کنگ بہ بیت۔
آئی ءَ گوشتگ کہ انچو سال ءِ گوزگ ءَ مھر گل مری انگت ءَ ھم آمیدگس ءَ پیش کنگ نہ بیتگ۔ آئی بابت ءَ آئی کھول ھم سرپد کنگ نہ بیت۔ چہ اے گپ ءَ ھمے گندگ بیت کہ ڈیھ ءَ ادارہ وت ءَ چہ آئین ءُ کانود ءَ ھم برز سرپد بنت۔
نسر اللہ بلوچ ءَ گوشتگ کہ اگاں مھر گل مری ریاست ءِ میار بار اِنت گڑا آئی سزا سرجمیں کھول ءَ چی ءَ دیگ بہ بیت۔ مئے کوٹ ھمیش اِنت کہ اگاں آئی سر ءَ چونیں ھم بھتامے ھست گڑا آمیدگس ءَ پئش کنگ بہ بیت۔
