اسلام آباد: بلوچستان ءِ ریاستی زوراکیانی آماچیں کھولانی زھرشانی نندانک ءَ اسلام آباد ءِ دگانی سر ءَ پنجاہ ءُ ھشت روچ سرجم بیتگ کہ انگت ءَ برجاہ اِنت۔
چہ سرکار ءِ نیمگ ءَ پہ آیانی لوٹانی منگ ءَ ابید ھمک روچ گوں جتائیں وڑے ءَ زوراکیانی آماچ بوگ ءَ اَنت۔ گوں ھور ءُ موسم ءِ ھرابی ءَ ھوار چہ درسیں زوراکیاں ابید زھرشانی ءَ نشتگیں کھول پہ وتی لوٹانی ھک ءَ پر ایمن ءَ نشتگ اَنت۔
آیانی گوشگ اِنت کہ ما مرچی وتی زھرشانی جاہ ءَ اتکگ ایں دیستگ کہ اد ءَ گاڑی اوشتاتگ اَنت، ما گوں نرمی چہ انتزامیہ ءَ لوٹ کرتگ کہ مئے جاہ ءَ ھالیگ بہ کن اِت بلے آیاں مئے گپ گوش نہ داشتگ ءُ مارا دگ ءِ سر ءَ پہ اوشتگ ءَ لاچار کرتگ۔
آیانی گوشگ اِنت کہ ما اے پنجاہ ءُ ھشت روچانی میان ءَ پر ایمن بیتگ ایں ءُ کس تنگ نہ کرتگ۔ بلے آیاں پیسر ءَ کِر ءُ کشانی ھند بند کرتگ اَنت ءُ نوں مئے زھرشانی جاہ ءِ بند کنگ ءِ جھد ءَ کنگ ءَ اَنت۔
آیانی گوشگ اِنت کہ اسلام آباد ءِ انتزامیہ ءَ اے پیرزالیں مات ءُ گھارانی جنجالانی پرواہ نیست۔ اے پیسر ءَ ھم پدر بیتگ اَنت ءُ نوں گیشتر پاشک بوگ ءَ اَنت۔ چہ درسیں زوراکیاں ابید ما گوں پرایمنی ءَ وتی جھد برجاہ داشتگ۔ دانکہ مئے رھشون ءُ آزیز آجو نہ بنت مئے زھرشانی برجاہ بیت۔
