ھزدار: چه بلوچستان نیشنل پارٹی ( بی این پی ) ءِ نیمگ ءَ 2 ستمبر ءَ بی این پی ءِ مچی ءِ سر ءَ بیتگیں وتکش بمب تراک ءِ بگیری ءِ گل ءِ شھیدانی یات ءَ زھرشانی روانکے کشگ بیتگ۔
زھرشانی روانک چه وڈ زانشجاه ءَ بندات بیتگ ءُ پریس کلب ءِ دیم ءَ مردم مچ بیتگ اَنت، روانک ءَ جنین ءُ زھگاں ھوار مردماں بازیں کچے ءَ بھر زرتگ۔
زھرشانی کنوکاں گوشتگ که سردار اکتر مینگل ءُ آدگه کارکنانی سر ءَ بیتگیں اُرش لگوری کاروائی یے ، مارا داھش ءَ نه کشتگ ما وتی دژمن ءَ شریں وڑے ءَ زان ایں ، اگاں سرکار اے پیمیں اُرشانی دیم ءَ داشت نه کنت گڑا اِشانی درسیں زمه وار سرکار وت اِنت ، بلوچستان ءِ سرکار بے سوب بیتگ که آ وتی شھریاں ھم پھریز کرت نه کنت ، چه آئی ءَ دگه ھچ وڑیں اوست دار نه بیت۔
آیاں گوشتگ که بلوچستان ءَ هر کس که پہ بلوچ راج ءِ ھکاں توار چست کنت زندان ءَ بندیگ کنگ بیت ، ماه رنگ بلوچ، راج ءِ ٹوھیں توارے اَت بلے آ بے میار ءَ زندان ءَ بندیگ کنگ بیتگ دانکه په بلوچ راج ءَ توار چست کرت مه کنت ، سردار اکتر مینگل ھم ھمے میار ءَ سزا دیگ بوگ ءَ اِنت که آ بلوچ راج ءِ سر ءَ بیتگیں زوراکیانی بابت ءَ گپ ءَ اِنت۔
