گزہ: اسرائیلی پوج ءَ گزہ ءِ نسیرات ءَ باھوٹیانی گدان ءِ سر ءَ بمبگواری کرتگ۔
جھانی رسانکدر ءِ رد ءَ اسرائیلی پوج ءَ پنچ شمبے ءِ روچ ءَ باھوٹیانی گدان نشانگ کرتگ اَنت کہ ارش ءِ آسر ءَ ھپت پلستینی مرتگ کہ گوں آیاں سے زھگ ھم ھوار اِنت۔
ھمے وڑ ءَ زرباری رپھ ءَ ھم اسرائیلی پوج ءَ کمک ءِ ودار ءَ نندوکیں مردمانی یک ٹولی یے ءِ سر ءَ ھما وھد ءَ تیرگواری کرتگ کہ آ کمکی سامانانی بنجاہ ءِ نزیک ءَ بوتگ انت۔ اے ارش ءَ ھپت مردم مرتگ ءُ باز ٹپی بوتگ۔
الجزیرہ ءِ رد ءَ گزہ ءَ اسرائیلی پوج ءِ جھلی ءُ برزی ارشاں کم چہ کم 75 مردم مرتگ۔ اسرائیل ءَ گوستگیں سے روچاں 250 ءَ گیش پلستینی کشتگ۔
اکوام متھدہ ءِ رد ءَ دو سال ءِ جنگ ءَ اسرائیلی پوج ءَ گزہ ءِ 21 ھزار زھگ سانمند کرتگ۔
دومی نیمگ ءَ اسرائیلی پوج ءِ گوشگ انت کہ آئی گزہ شھر ءِ 40 درسد بھرگ دستیگ کرتگ۔
پوج ءِ جارکش ءِ گوشگ انت کہ گزہ ءَ آیوکیں روچاں بیوکیں لشکر کشی گیش ترند بنت۔ پوجی کاروائی داں ھما وھد ءَ ھلاس نہ بنت دانکہ اسرائیلی بندیگ یل کنگ نہ بنت ءُ ھماس ءِ واکداری ھلاس نہ بیت۔
