شال: وائس پار بلوچ مسنگ پرسنز ( وی بی ایم پی ) ءِ سرکماش نسرالله بلوچ ءَ زوربیگواھی ءِ میان استمانی روچ ءِ درگت ءَ چہ وی بی ایم پی ءِ زھرشانی گدان ءَ پریس کانپرس کرتگ ءُ گوشتگ که بلوچستان ءَ زوریں بیگواهی ءِ درچ ءَ باز سال اِنت که برجاه اِنت چه ایشی ءَ هزارانی کچ ءَ کھول سکا آزار ءُ جنجالانیِ آماچ اَنت۔
آئی ءَ گوشتگ که چه زوریں بیگواھی ءَ جتائیں بھرگ سانمند بیتگ اَنت ، سانمندیں مردمانی رد ءَ 2025 ءَ زوربیگواھی گیش بیتگ ءُ سدانی کچ ءَ ورنا ءُ آدگه مردم زوربیگواه کنگ بیتگ اَنت ، ھمے درچ ءَ لھتیں جنین ھم چه گساں آوار جنگ بیتگ اَنت که اے چادر ءُ دیوالی ءِ کم شرپی ءُ تچک ءَ بگیری اِنت۔
نسرالله بلوچ ءَ گوشتگ که زوربیگواھیں مردم آمیدگس ءَ هم پیش کنگ نه بنت ءُ آیانی بابت ءَ هچ وڑیں ھال دیگ نه بیت که چه ایشی ءَ بازیں کھول پریشان اِنت ، یک سانمندیں جنینے ءَ گوشتگ اَت که ” دریگتیں مئے زوریبگواه کنگ بیتگیں مردم بیران ایں کم چه کم ما کل کرتگ اَت بلے مروچی اے ھم زانگ نه بیت که آ زندگ اِنت یا ناں۔
نسرالله بلوچ ءَ پریس کانپرس ءَ درسیں زوربیگواھیں مردمانی زوت یل کنگ ءِ لوٹ کرتگ ءُ گوشتگ زوربیگواھیں بلوچانی درکانودی کُشگ بند کنگ به بیت ، اگاں کسے ءِ سر ءَ بھتام ھست آمیدگس ءَ پیش کنگ به بیت ءُ آئی ءَ کانودی کاروائی ءِ ھک دیگ به بیت. اگاں زوربیگواھیں مردمے بیران بیتگ آئی ءَ کھول هال دیگ به بیت ، اے درکانودی کاراں ھواریں مردمانی بگیری ءَ تچک ءَ کانودی کاروائی کنگ به بیت۔
پریس کانپرس ءَ زوربیگواهیں ورنا مھمود الی لانگو ، نیامت الله ، ابدالپتھ ، سدام ھسین کرد ، گلام پاروک سرپره ءُ جھانزیب مھمد ھسنی ءِ کھولاں ھم بھر زرتگ ءُ وتی آزیزانی دوری ءِ بابت ءَ وتی ترس ءُ جنجال درشان کرتگ اَنت ءُ انساپ ءِ لوٹ کرتگ ، کھولاں گوشتگ که آ وتی آزیزاں ھچ وھد ءَ بے ھال نه بنت ءُ دانکه انساپ رسگ ءَ وتی جھد ءَ برجاه دار اَنت۔
