ھزدار: سردار الی مھمد کلندرانی ءَ وتی شنگ کرتگیں درشانے ءَ گوشتگ کہ پانزدہ سال پیش منی کھول ءِ بازیں مردمانی گون ءَ منی سے زھگ بیگواہ کنگ بیتگ۔ مارا ھمک روچ دروگیں دلبڈی داتگ کہ مرچی نہ باندا یل کنگ بنت، آیانی دروگیں کولاں چنچو سال گوستگ کہ داں مرچی ھم مئے گون ءَ انساپ کنگ نہ بیتگ۔ نوں منی چارمی زھگ آوار جنگ بیتگ۔
آئی ءَ گوشتگ کہ یوسپ بلوچ مدام ایمن بیتگ ءُ لس مھلوک ءِ کمک ءَ بیتگ، آئی سرجمیں جھد گواہ اِنت کہ آ پر ایمنیں کارکن ءُ وتی راج ءِ کمکارے اِنت۔
سردار الی مھمد ءَ گوشتگ کہ مئے میار ھمیش اِنت کہ ما توپک چست نہ کرتگ ءُ کسی ھک نہ پل اتگ۔ زوراکی ءُ لٹ ءُ پلیں نزام ءِ بھر نہ بیتگ ایں۔ اگاں ایمن دوستی ءُ ھک ءَ سر ءَ اوشتگ میارے گڑا ما اے میارباری ءِ سر ءَ پھر بند ایں۔
آئی ءَ گوشتگ کہ من گوں مھلوک ءَ لوٹ کن آں کہ منی کیس ءَ گوش بدار اَنت ءُ لس مھلوک ءِ آمیدگس ءَ منی جست ءَ بہ کن اَنت، منی کھول ءِ گون ءَ بیتگیں زوراکیانی گواہ بہ بنت۔ مرچی مئے گون ءَ چے کہ بوگ ءَ اِنت آ تھنا زاتی بیرگیری ءُ سیاسی دژمنی اِنت۔ادارہ پہ لھتیں مردمانی وشاں کنگ ءَ بے میارانی گون ءَ زوراکی کنگ ءَ اَنت۔
سردار الی مھمد کلندرانی گوشگ ما تچک ءَ گوش ایں کہ ما پہ زور ءُ بیھار بے توار نہ بہ ایں۔ دانکہ مھلوک ءِ توکل ءُ زور مئے ھمراہ اَنت ما وتی جھد ءَ برجاہ دار ایں ءُ ھر پیمیں زوراکیاں پاشک کن ایں۔
آئی ءَ گوشتگ کہ من وتی راج، جی یو آئی ءُ درسیں نہ ترسیں سنگتانی منتواراں کہ آ مرچی ھزدار ءَ اے نندانک ءَ منی ھمراہ اَنت۔ اے جھد چنچو دراجکش بہ بیت بلے ما پد نہ کنز ایں۔ مئے جھد داں ھما وھد ءَ برجاہ بیت دانکہ یوسپ بلوچ آجو مہ بیت ءُ من ءُ منی کھول ءَ انساپ دیگ مہ بیت۔
