کراچی پریس کلب ءِ دیم ءَ زوربیگواھیں مردمانی کھولانی برجاھیں زھرشانی گدان ءَ مرچی 22 روچ اِنت که برجاه اِنت ، کھولاں وتی زھگانی زوت آجو کنگ ءِ لوٹ کرتگ۔
ھمے میان ءَ زوربیگواھیں زاھد بلوچ ءِ پت ھمید بلوچ ءَ گوشتگ چه زاھد بلوچ ء ِزوربیگواھی ءَ سرجمیں کھول سسائی آزارانی دیمپان اِنت ، اگاں آئی ءِ سر ءَ چونیں بھتامے ھست گڑا آمیدگس ءَ پیش کنگ به بیت دانکه آئی ءَ گپ کنگ ءِ موه دیگ به بیت ۔
ھمے وڑ ءَ زوربیگواهیں سرپراز بلوچ ءِ مات بی بی گلشن بلوچ ءَ گوشتگ که منی زھگ مئے گس ءِ والینوک بیتگ ءچه آئی ءِ بیگواھی ءَ پد مئے کھول سکا جنجال اِنت ، منی زھگ یک بے میار ءُ کار ءُ باری ورنایے بیتگ که بے میار ءَچه گس ءَ آوار جنگ بیتگ ، ما اے بابت ءَ انساپ لوٹ ایں ءُ مئے زھگ یل کنگ بہ بیت۔
چه ایشی ءَ ابید ماڑی پور ءِ ھند سنگھور پاڑه ءِ جاه منندیں مات سبزی بلوچ ءَ ھم گوشتگ که منی دو زھگ شیراز ءُ سیلان 23 مئی 2025 ءَ سی ٹی ڈی ءِ کارمنداں چه گس ءَ آوار جتگ ءُ بیگواه کرتگ اَنت انگت ءَ آیانی ھچ وڑیں ھال نیست ، منی دوئیں زھگ بے میار اَنت ءُ چه آیانی زوربیگواھی ءَ سرجمیں کھول جنجال اِنت۔
