11 اگست سوگند سرسبزی روچ ءِ درگت ءَ بی این ایم ءَ آواران ھنکین ءِ رد ءَ دو جتائیں جاھاں کسانیں تکے ءَ مچی کرتگ کہ آیانی تہ ءَ گل ءِ باسک ءُ دوزواھاں بھر زرتگ۔
اے درگت ءَ گْوشتانک دیوکاں 11 اگست ءِ گْوستانکی پژدر ءَ گپ جتگ ءُ پہ بلوچستان ءِ آجوئی ءَ جان نْدر کنوکیں شھید ساڑاتگ اَنت، آیاں گْوشتگ بلوچ راج وتی گیدریں اوبادگانی دیمونیانی برورد ءَ گھگیری ءُ جھد ءَ سرچکاریں انچیں گْوستانکے ءِ واھند اِنت کہ آئی ءِ سر ءَ ما پھر بند ایں۔
آیاں گْوشتگ وھدے راجے زورگپت بیت گڑا آ بدتریں جاورانی آماچ بیت۔بلوچاں پیسر ءَ ھم زورگرانی دیمپانی کرتگ ءُ مروچی ھم پاکستانی زورگری ءِ بگیری ءَ جنگ ءَ اِنت۔زورگراں ھرچ زمانگ ءَ ھونانی جو ملینتگ چوش کہ مئے دمگ ءَ منگول ، بربر ءُ مگلاں لٹ ءُ پل ءُ کشت ءُ کوش کرتگ بلے تانسر ءَ اے توان گار ءُ گمسار بوت اَنت ءُ بلوچ وتی مانشت ءِ جنگ ءَ سوبین بوت۔مروچی پنجاپی ریاست ھم پہ وتی سیتاں مئے زمین ءُ مڈیانی سر ءَ زورگر اِنت بلے اے زورگری ھم بلوچ راجی جھد ءُ گھگیری ءِ برپشت ءَ آسر بیت ءُ بلوچستان پد ءَ آجو بیت۔
گْوشتانک دیوکاں درائینتگ وھدے انگریز گوں زور ءَ بلوچستان ءِ گرگ ءَ بے سوب بوت اَنت گڑا آیاں پندلی مسامانی پارست ءَ بلوچستان ءِ زمین باڑا ءِ سر ءَ زرت اَنت ءُ رند ءَ مسام نہ من اِت اَنت ءُ بلوچستان ءِ مزنیں زمینے دستیگ کرت ءُ زورگر بوت اَنت۔مئے دمگ ءَ اگست 1947 ءَ انگریزانی درکپگ ءِ شور ءَ پد نوک آبادی باریگ آسر بوت بلے پاکستان ءَ انگریزانی روگ ءَ پد پہ ھمایانی سیتانی پانپاہ ءِ بستار ءَ نوک آبادی کرد ءُ کار برجاہ داشت اَنت۔ پاکستان مروچی پشت کپتگیں نوک آبادی توان ءِ بستار ءَ بلوچستان ءِ سر ءَ زورگر اِنت، بلوچ راج ءِ آجوئی ئِے پل اتگ ءُ آ چہ درسیں ھکاں زبھر ئِے کرتگ۔
آیاں گْوشتگ مارا مارشتانی جاہ ءَ گوں سنچ ءُ سار وتی جھد دیم ءَ برگی اِنت۔بی این ایم ءِ پتر بلوچ راجی سنچ ءُ زانشتی جھد ءِ چیدگ اِنت، بلوچ سرمچار ھم اے راجی گل ءَ وتی سیاسی ءُ لیکھی سنگر من اَنت۔ ما چہ اے مردمی توان ءَ بندگی ءِ بگیری ءَ بلوچ راج ءِ تہ ءَ سنچ ودی کن این ءُ جھان ءَ ڈس ایں کہ بلوچ چہ وتی آجوئی ءَ دستکش نہ بیت۔
