اسلام آباد بلوچ یکجھتی کمیٹی ءِ سروک ءُ زور بیگواھیں مردمانی کھولانی زھرشانی ءَ سی ءُ یک روچ سرجم بیتگ۔اسلام آباد پولیس ءَ مرچی پد ءَ زھرشانی کنوکیں مردمانی گون ءَ زوراکی کرتگ ءُ پریس کلب ءَ روگ ءَ نہ اشتگ اَنت۔ پولیس ءَ زھرشانی کنوکیں زھگ ءُ جنین تیلانک داتگ اَنت۔
اے بابت ءَ بلوچ یکجھتی کمیٹی ءِ سروک سمی دین ءَ ماں رسانکدر ءَ وتی پوسٹے ءَ نبشتگ کہ زی ما راپد ءَ اسلام آباد پریس کلب ءِ دیم ءَ زھرشانی کنگ ءِ موکل دیگ بیتگ اَت، ما چہ ایشی وش بیت ایں ءُ ھمے سرپد بیت ایں کہ مارا بلکیں نوں ھمک وھد ءَ اود ءَ پر ایمنیں زھرشانی کنگ ءِ ھک دیگ بیتگ۔ بلے راستی ھمیش اِنت کہ اے موکل تھنا پہ چاردہ اگست ءِ شاتکامی ءِ سوب ءَ انتزامیہ ءِ لاچاری بیتگ، چی ءَ کہ چہ ھمے راہ ءَ شاتکامی کنوکانی کاروان گوزگی بیتگ۔
آئی ءَ گوشتگ کہ وھدے ریاست یا انتزامیہ ءَ وت ءَ کار بہ بیت آ راہ ءَ پچ کن اَنت بلے دومی روچ ءَ پد ءَ ھما راھاں بند کن اَنت۔
سمی دین ءَ گوشتگ کہ مرچی کھولاں دگ پچ کنگ ءِ لوٹ کرتگ گڑا پولیس ءَ زوراکی کنگ بندات کرتگ۔ زھرشانی کنوک زاہ ءُ تیلانک داتگ ءُ ٹپی کرتگ اَنت۔ اے درسیں زوراکی پمشکا کنگ بیتگ اَنت کہ ما بلوچستان ءِ نزوریں مردم ایں۔ مئے گون ءَ آ چونیں ھم زوراکی بہ کن اَنت آیاں دگہ جست گروک نیست۔
