بلوچ لبریشن آرمی ( بی ایل اے ) ءِ جارکش جیھند بلوچ ءَ ماں رسانکدر ءَ وتی شنگ کرتگیں درشانے ءَ گوشتگ که بی ایل اے ءِ سرمچاراں گوادر ءِ ھند جیمڑی ءَ زورگریں پاکستانی پوج گوں چیرکرتگیں شورھاں نشانگ کرتگ ، ھمے وڑ ءَ نوشکے ءُ کلات ءَ زورگریں پوج ءِ دو دزگیر کرتگیں چریک سمی الله سرپره ءُ نزام کرد ءِ میارانی منگ ءَ مرگ ءِ سزا داتگ اَنت۔
آئی ءَ گوشتگ که مرچی گوادر ءِ ھند جیمڑی ءَ بی ایل اے ءِ سرمچاراں گوں چیر کرتگیں شورھاں پاکستانی پوج ءِ کارمند ھما وھد ءَ نشانگ کرتگ اَنت که آیاں دگ بستگ ءُ چه گاڑیاں باج گرگ ءَ بیتگ اَنت ، اُرش ءِ آسر ءَ زورگریں پوج ءِ یک کارمند الله داد جاھی مرتگ ءُ ھمے وڑ ءَ دومی سکا ٹپی بیتگ۔
آئی ءَ گوشتگ که تراک ءَ پروش وارتگیں زورگریں پوج ءَ وتسریں تیرگواری کرتگ که ایشی آسر ءَ بازیں لس شھری ٹپی بیتگ ءُ پوج ءَ وتی زوراکی برجاه داشتگ ءُ بازیں مردم زوربیگواه کرتگ۔
جارکش ءَ گوشتگ که بی ایل اے ءِ سرمچاراں 13 جون ءَ گرگینه ءَ سمی سرپره ء پتے مھمد سرپره جاه منند نوشکے پجارگ ءَ پد دزگیر ، جست ءُ پرس ءِ میان ءَ آئی ءَ من اتگ که آ اکتر بادینی ءِ پارست ءَ گوں آئی ایس آئی ءَ بندوک بیتگ ءُ چه 2014 ءَ په زورگریں پاکستانی پوج ءُ آئی ایس آئی ءَ چریکے ءِ دروشم ءَ کار ءَ بیتگ۔
آئی ءَ گوشتگ که سمی سرپره ءَ من اتگ آ 2014 ءَ آمر جمالدینی ءِ زوربیگواه کنگ ءَ ھوار بیتگ که رند ءَ آئی ءِ ژانگولیں لاش چگل دزکپتگ ، آئی ءَ نوشکے ءُ کش ءُ کراں گسانی سر ءَ بیڑ برگ ، جنین ءُ کماشانی کم شرپ کنگ ءُ ورناھانی زوربیگواھی ءَ پوج ءِ تچک ءَ کمک بیتگ ، یاسر جمالدینی ءِ لگور کنگ ءُ چه ایشی ءَ پد په چیریں ادارھاں آئی ءِ کار بندگ ءَ هم هوار بیتگ۔
جارکش ءَ گوشتگ که چه ایشی ءَ ابید هم سمی سرپره ءَ دگه بازیں مردم په پوج ءِ چاریگی ءُ کشنده ٹولی ءَ گچین کرتگ اَنت ، آئی ءَ وتی سنگتانی ھواری ءَ آدگه مردمانی نام ھم پاشک کرتگ اَنت که په زورگریں پوج ءَ کار ءَ اَنت۔
آئی ءَ گوشتگ که بلوچ راجی آمیدگس ءَ راجدروهی ءُ آئی ءِ میارانی سزا ءَ سمی سرپره ءَ مرگ ءِ سزا داتگ که 23 جون ءَ لجے ءَ ایشی ءِ سر ءَ کار کنگ بیتگ۔
جارکش ءَ گوشتگ که همے وڑ ءَ مستونگ ءِ ھند اسپلنجی مرو ءَ نزام کرد ء ٹکری نورالدین جاه منند کلی دزگیر کرتگ ، جست ءُ پرس ءِ میان ءَ آئی ءَ من اتگ که گوستگیں پنچ سال ءَ زورگریں پوج ءِ چریک بیتگ ، آئی ءَ گوشتگ که آئی ءَ اسپلنجی ، کولپور ءُ شال ءِ پوجی بنجلاں ھرابیں جنین برتگ ءُ ھمے وھداں آ وت ھم بدکاری ءِ آماچ بوتگ که ایشی جاہ ءَ آئی ءَ زر دیگ بوتگ۔
آئی ءَ گوشتگ که نزام کرد ءَ دیمتر ءَ من اتگ که آ گوکرت ، مچ ءُ مستونگ ءَ زورگریں پوج ءِ زوراکی کاروائیاں ھوار بیتگ ءُ باز رند ءَ گوں پوج ءَ داں گوادر ءَ هم شتگ۔
جارکش ءَ گوشتگ که بلوچ راجی آمیدگس ءَ میارانی منگ ءَ پد نزام کرد ھم مرگ ءِ سزا داتگ که گوستگیں روچ ءَ سرمچاراں ایشی سر ءَ کار کرتگ۔
جیھند بلوچ ءَ درشان ءِ گڈی ءَ دوئیں چریکانی کوش ءُ پاکستانی پوج ءِ سر ءَ اُرش ءِ زمه واری من اتگ۔
