بلوچ نیشنل موومنٹ ( بی این ایم ) ءِ انسانی ادارہ پانک ءَ وتی شنگ کرتگیں درشان ءَ بلوچستان اسمبلی ءِ منگ بیتگیں ناشرکاری ( بلوچستان ترمیمی ) 2025 ءِ بل ایر جتگ ءُ گوشتگ کہ بلوچستان ءَ انسانی ھکانی لگتمالی ءَ گیش کنت۔ راھبند ءِ آرٹیکل 10 ءِ پارست ءَ گیش کنگ پوج، نیم پوجی، چیریں ادارہ ءُ پولیس ءَ شک ءِ بنیاد ءَ داں سے ماہ ءَ بندیگ کنگ ءِ واک دیگ ءَ ایشی چہ کانود ءِ بنیاد ءَ ریاستی سروکی ءَ بیوکیں زوراکیانی کانود ءِ ارزشت دیگ ءِ ترس اِنت۔ اے ترس ءَ انگت ءَ گیش کنت ءُ ناشرکاری ءِ نیمون ءَ سیاسی بگیری ءُ شھریانی ھک ءِ گپ ءَ دار ایت۔
آئی ءَ گوشتگ کہ بلوچستان ءَ دراجکشیں وھدے بیت کہ انسانی ھکانی لگتمالی بوگ ءَ اِنت، ایشی مسال چہ زوریں بیگواھی ءُ درکانودی کوش ءُ آزار دیگ ءَ دست کپ ایت۔ پہ درور کھولاں وتی آزیز، بزاں سیاسی کارکن ءُ نودربرانی پوج ءِ دست ءَ درکانوی آوارجنی ءِ ھال داتگ کہ آ چہ سالاں آزار جاھاں بندیگ اَنت۔ تھنا 2025 ءِ پانک ءَ چہ پیسر ءَ آوار جتگیں مردمانی درکانودی کوش ءِ شست ءُ شش کیس رپورٹ کرتگ۔ پر ایمنیں زھرشانیاں انچوش کہ بلوچ یکجھتی کمیٹی ءِ سروک آزار داتگ اَنت ءُ زوراکیانی آماچ اَنت، پوج ءَ تیرگواری ھم کرتگ، انچوش کہ گوادر مچی ءَ چاردہ مردم ٹپی بیتگ اَنت۔
آئی ءَ گوشتگ کہ مینٹیننس آف پبلک آرڈر (3MPO) پہ بگیریانی دارگ ءَ یک جوانیں بنشونے بیتگ کہ اے پہ بی وائی سی ءِ سروکانی بگیری ءَ کارمرز کنگ بیتگ۔ مارچ 2025 ءَ بی وائی سی ءِ سروک ڈاکٹر ماہ رنگ بلوچ ءُ آدگہ کارکن بیبرگ بلوچ، گلزادی بلوچ، بیبو بلوچ ءُ شاہ جی سبگت اللہ ءَ چہ شال ءَ ایمنیں زھرشانی ءِ میان ءَ تھری ایم پی او ءِ رد ءَ دزگیر کنگ بنت۔ اے دزگیریانی کانودی نیمون دیگ ءَ ابید بلوچستان آمیدگس ءِ کِر ءَ دگہ راہ نیست۔ 11 اپریل 2025 ءَ پیسلہ کنگ بیتگ پد ءَ پہ آمیدگس ءِ آجوئی ءِ بابت ءَ ترس ودی بیتگ گڑا اے لوٹ ھلاس کنگ بیتگ۔ ھالانی رد ءَ گوں آیان سکا زوراکی کنگ بیتگ، کاؤنٹر ٹیررازم ڈیپارٹمنٹ ( سی ٹی ڈی ) ءِ نیمگ ءَ بیبو بلوچ ءِ 23 اپریل 2025 ءَ چہ ھدہ بندیگجاہ ءَ زور کشگ ءُ پشین بندیگجاہ ءَ برگ ءُ پد ءَ آزار دیگ ءُ چیریں آزار جاھے ءَ بندیگ کنگ۔ گوں کھول ءَ گندوک ءَ نہ اشتگ ءُ آئی جان ءَ ٹپانی نشان ھم گندگ بیتگ اَنت۔ چہ سرجمیں بلوچستان ءَ انسانی ھکانی ٹولی ءُ کانود ءِ انجمنانی نیمگ ءَ مزنیں کچےءَ زھرشانی کنگ ءُ ایر جنگ بیتگ۔
آئی ءَ گوشتگ کہ پانک گوں لس بلوچ ءُ بی وائی سی ءَ یکجھتی کنگ ءَ ساڑی اِنت۔ ھما کہ زوریں بیگواھی ءُ ریاستی آزارانی بگیری ءَ گوں پر ایمنیں جھد ءَ زوراکیانی دیم پہ دیمی ءَ کنگءَ اَنت۔ ما گوں میان استمانی تک، انسانی ھکانی گل ءُ سول سوسائیٹی ءَ زور دے ایں کہ آ ناشرکاری بل 2025 ءِ زوتیں ھلاسی، بندیگیں کارکنانی یل کنگ ءُ بلوچستان ءَ انسانی ھکانی بگیریانی بابت ءَ پٹ ءُ پول ءِ لوٹ ءَ بہ کن اَنت۔ پہ انساپ ءُ شرپ ءِ لوٹ ءَ شھری ءُ کارکنانی آزار دیگ ھلاس کنگ بہ بیت۔
