بلوچ نیشنل مووومنٹ ( بی این ایم ) ءِ بنجاھی کارگشاد دل مراد بلوچ ءَ ماں رسانکدر ءَ مالار مچی ءَ پاکستانی لشکر ءِ زوراکیانی پژدر ءَ آواران ءَ پاکستانی لشکر ءِ نیمگ ءَ تیوک ءَ نوہ روچانی زوراکیانی سرجمیں ھال شنگ کرتگ ۔
آئی ءَ نبشتگ کہ 19 مئی 2025 ءَ پاکستان ءَ مالار ءِ میتگ بنگل بازار ءَ لیویز کارمند یونس ء رسول بکش چہ گس ءَ آوار جتگ ءُ آئی ءَ بی ایل ایپ ءِ سرمچاری ءِ نام داتگ ءُ دروگیں میڑ ءَ کشتگ۔ 21 مئی 2025 ءَ پاکستانی لشکر ءَ ورنائیں ساجد ء مستری ناسر جاہ منند کولواہ گشانگ چہ گس ءَ آوار جتگ ءُ سھب ءَ مھلہ آئی تیرسپتگیں لاش چگل داتگ۔
دل مراد بلوچ ءَ گوشتگ کہ 23 مئی 2025 ءَ جاھو ءِ میتگ ٹوبوکڈ ءَ پاکستانی لشکر ءَ ورنائیں ھنیپ ء ازیز سھب ءِ پنچ ءَ چہ گس ءَ آوار جتگ ءُ بیست دمان ءِ دوری ءَ کشتگ ءُ آئی لاش ڈگارانی سر ءَ چگل داتگ۔ 24 مئی 2025 ءَ مشکے ءِ ھند شریکی ءَ اھوالکار لالا لتیپ ءِ گس ءَ بیڑ برتگ ءُ آئی ءَ کھول ءِ دیم ءَ تیرگواری کرتگ ءُ کشتگ۔
آئی ءَ دیمتر ءَ نبشتگ کہ 26 مئی 2025 ءَ کولواہ ءِ میتگ مالار مچی ءَ پاکستانی لشکر ءَ ورنائیں گوس بکش ء ماسٹرالاھی بکش وتی بنجل ءَ لوٹائینتگ ، دومی روچ ءَ آئی لاش وھلی ڈن ءَ چگل داتگ۔ 27 مئی 2025 ءَ کولواہ ءِ میتگ مالار مچی ءَ پاکستانی لشکر ءَ گسے ءَ بیڑ برتگ ءُ تیرگواری کرتگ۔ تچک ءَ تیرگواری ءَ ورنائیں نئیم ءُ آئی ترو زتک بی بی ھوری ء کاسم جاھی کشگ بیتگ اَنت ءُ نئیم ءِ مات بی بی دادی بلوچ ء نسیب سکا ٹپی بیتگ۔
دل مراد بلوچ ءَ گڈسر ءَ نئیم بلوچ ءِ کھول ءِ زھرشانی ءِ بابت ءَ نبشتگ کہ آیاں نئیم ءِ لاش آواران بازار ءَ ایر کرتگ ءُ زھرشانی کنگ ءَ اَنت۔
