بلوچ نودربر گل بی ایس او آزاد ءِ سروک زور بیگواھیں زاکر مجید ءِ مات ءَ وتی شنگ کرتگیں تامربندے ءَ گوشتگ کہ زاکر مجید بلوچ 8 جون 2009 ءَ پاکستانی لشکر ءُ چیریں ادارھانی کارمنداں زور بیگواہ کرتگ۔
آئی ءَ گوشتگ کہ زاکر جان ءِ گون ءَ دگہ دو مردم بیگواہ کنگ بیتگ کہ آ رند ءَ یل کنگ بیتگ اَنت، بلے زاکر داں مرچی پاکستان ءِ چیریں آزارجاھاں بندیگ اِنت۔ زاکر یک نودربر ءُ بی ایس او ءِ کمک سرکماش بیتگ۔
آئی ءَ دیمتر ءَ گوشتگ کہ من ءَ چنچو سال اِنت کہ پہ زاکر مجید ءَ جھد کنگ ءَ آں۔ وھدے کہ من بلوچستان ءَ بیتگ آں پہ زاکر جان ءَ زھرشانی کنگ ءَ بیتگ آں۔مرچی من یک ارمانے ءِ گون ءَ یو کے ءَ اتکگ آں۔ من ھمے ودار ءَ آں کہ زاکر جان کدی آجو بیت من آئی ءَگند آں۔
زاکر مجید ءِ مات ءَ گوشتگ کہ من مرچی ھمے اوست ءَ دار آں کہ یوکے ءِ جاہ منندیں بلوچ مرد، جنین ءُ زھگ مئے زھرشانیءَ بھر زور اَنت ءُ اے زھرشانی ءَ سوبمند کن اَنت۔
آئی ءَ گوشتگ کہ اے زھرشانی ھشت جون ءَ برتانیہ ءِ شھر لندن ءَ بیگاہ ءِ سے ءَ داں چار ءَ بیت۔ من ھمے لوٹ ءَ کن آں اے زھرشانی ءَ بھر بزور اَنت ءُ زھرشانی ءَ سوبمند بہ کن اَنت۔
