اکوام متھدہ ءِ مردمی ھکانی جھگیر میری لالر ءَ زی اسلام آباد ءَ زھرشانی نندانک ءِ سروک ڈاکٹر ماہ رنگ ءُ سمی دین ءِ گون ءَ ویڈیو لنک ءَ تران کرتگ ءُ روانک ءِ بارو ءَ وتی ھیال درشان کرتگ اَنت۔
میری لالر ءَ آنلائن گند ءُ نند ءِ بارو ءَ وتی چاگردی رسانکدر ءِ تندجاہ ءَ نبشتگ کہ آئی ءَ گوں سمی ءُ ماہ رنگ ءِ گون ءَ گپ ءُ تران کرتگ ءُ زوریں بیگواھی ءِ بگیری ءَ برجاھیں زھرشانی ءِ بارو ءَ وتی ھیال درشان کرتگ اَنت ءُ زھرشانی کنوکاں آئی گون ءَ اسلام آباد پولیس ءِ زوراکیانی گپ جتگ اَنت۔
آئی ءَ گوشتگ کہ پولیس ءَ پرایمنیں زھرشانی کنوکانی بگیری ءَ زوراکی ھلاس کنگ لوٹ اَنت۔
اے بارو ءَ ڈاکٹر ماہ رنگ ءَ ماں چاگردی رسانکدر ایکس ءَ میری لالر پوسٹ ءِ سر نبشتہ کرتگ کہ اکوام متھدہ ءِ مردمی ھکانی جھگیر ءَ پرایمنیں زھرشانی کنوکانی بگیری ءَ پولیس ءِ زوراکی، رسانکدر ءِ بدنیتی ءُ زور بیگواھیں مردمانی بارو ءَ پاکستان ءِ انوگیں وزیر ءِ بارو ءَ سرپد کرتگ۔ آئی ءَ مارا دلجمی داتگ کہ آ مئے جاور ءُ جنجالانی بارو ءَ ھیال ءَ برجاہ دار ایت۔
اے درگت ءَ سمی دین ءَ ماں رسانکدر ءَ نبشتگ کہ ما مرچی اے آنلائن نیاد ءِ میان ءَ روانک ءِ بارو ءَ اکوام متھدہ ءِ جھگیر سرپدی داتگ۔ آئی ءِ گون ءَ تونسہ ءَ باز مرددم ءِ دزگیری، پولیس ءِ منی گون ءَ ھوار آدگہ زھرشانی کنوکانی بگیری ءَ وتگڑیں ارزی نبیسگ بوتگ۔ مزن وزیر ءَ مارا ناشرکارانی ھمدرد لیکگ ءِ پیمیں ویلانی گپ جتگ اَنت۔
سمی دین ءَ دیمتر ءَ گوشتگ کہ ایشی ابید، من آئی ءَ وتی پت ءِ کیس، آئی آجوئی ءِ بارو ءَ وتی چاردہ سال ءِ جھد ءُ آدگہ زور بیگواھیں مردمانی بارو ءَ سرپد کرتگ۔ اکوام متھدہ ءِ جھگیر ءَ مارا دلجمی داتگ کہ آ مئے جاور ءُ زھرشانی کنوکانی جنجال ءُ ترس ءِ سر ءَ شریں وڑے ءَ ھیال گور کنت۔
