ھب چوکی: بوانی ءَ چہ زوربیگواھیں مردمانی کھول ءِ زھرشانی نندانک ءَ آیاں پریس کانپریس کرتگ ءُ گوشتگ کہ مئے زھرشانی نندانک ءَ گوستگیں بیست ءُ چار ادار اِنت کہ برجاہ اِنت، زی چار بیگواھیں مردمانی کھول نندوک بیتگ اَنت ءُ مرچہ شش کھول زھرشانی ءَ ساڑی اِنت۔ چہ ایشاں چاکر بگٹی 15 نومبر 2024 ءَ چہ ٹویوٹا شرکت ءِ دیم ءَ آوار جنگ ءُ بیگواہ کنگ بیتگ کہ انگت بیگواہ اِنت۔ چوش کہ زی ایس ایچ او بھروٹ ءُ ھبءِ ایس ایچ ءُ ھب ءِ ھنکیندار نندانک جاہ ءَ اتکگ ءُ آیاں ھمے گوشتگ کہ شما مئے گون ءَ تانہ ءَ بیا اِت ما چاکر ءَ شمئے گون ءَ ویڈیو کال ءَ گپ دار ایں، چہ ایشی ءَ ھمے پدر بیت کہ چاکر بلوچ ھمایانی کِر ءَ بندیگ اِنت۔ کھول ءِ گوشگ اِنت کہ ما ھمد ءَ نند ایں ءُ وتی نندانک ءَ برجاہ دار ایں۔
آئی ءَ گوشتگ کہ ھمے وڑ ءَ نوروز اسلام 11 نومبر 2024 ءَ ھبءَ چہ گس ءَ آوار جنگ ءُ زور بیگواہ کنگ بیتگ کہ اے آئی سیمی رند اِنت زور بیگواہ کنگ بیتگ۔ جنید ھمید 8 اکتوبر 2024 ءَ چہ ھب بوانی شاہ پمپ ءَ زور بیگواہ کنگ بیتگ، ھمے وڑ ءَ سے روچ ءَ پد یاسر ھمید کہ آ جنید ھمید ءِ برات اِنت 11 اکتوبر ءَ چہ کلات ءَ زور بیگواہ کنگ بیتگ۔ نسیر جان بلوچ 30 نومبر 2024 ءَ امیر آباد ءَ چہ گس ءَ آوار جنگ بیتگ۔ ھمے وڑ ءَ ندیم بلوچ 4 مارچ 2021 ءَ چہ امیر آباد ءَ زور بیگواہ کنگ بیتگ۔ ندیم ءِ دگہ دو برات گوں آئی ءَ ھوار زور بیگواہ کنگ بیتگ، یک براتے ھما وھد ءَ بندیگجاہ ءَ کشگ بیتگ ءُ یکے براتے آئی نام جمیل اھمد اِنت آ 2024 ءَ آجو بیتگ۔ زور بیگواھیں راشدھسین ءِ کھول ھم نندانک جاہ ءَ ساڑی اِنت۔
آئی ءَ گوشتگ کہ اے وھد ءَ نندانک ءِ کِر ءُ کشاں دامگ بند کنگ بیتگ ءُ مارا انچوش گمان کنگ بوگ ءَ اِنت کہ ریاست وتی بنامی ءِ کار ء کنت۔ بلے مئے زور مئے راج اِنت ءُ ما وتی مردمانی گون ءَ لوٹ کن ایں کہ چہ ریاست ءِ بنامیں کاراں پیش ھب ءِ کِر ءُ کشانی مردم نندانک جاہ ءَ آھگ ءَ وتی پرز سرپد بہ بنت۔
آئیءَ گوشتگ کہ ما ھمے پریس کانپریس ءَ ھمے گپ ءَ گوشگ لوٹ ایں کہ اے وھد ءَ مئے زھرشانی نندانک ءَ بیست ءُ چار داراہ سرجم اِنت بلے انگت ءَ ھچ وڑیں گامگیج زورگ نہ بیتگ، ما ریاست ءُ انتزامیہ ءَ بیست ءُ چار ادار ءِ وھد دے ایں اگاں مئے مردم آجو مہ بنت ما وتی آھوکیں گامگیج ءِ جار ءَ جن این ءُ وتی زھرشانی ءَ دراجکش کن ایں۔
