بساک اوتل ھنکین ءِ نیمگ ءٙ 2 مارچ 2024 ءٙ پہ نوک اَتکگیں نودربراں وش آتکی ءُ بلوچ دود ءُ ربیدگی روچ ءِ درگت ءٙ یک مراگشے ”سباء لٹریری پیسٹیول “ ءِ نام ءَ اڈ دیگ بوتگ۔
دیوان ءَ گُشتانک، ٹیبلو، کسمانک،پینل ڈسکشن، کلچرل ایگزبیشن ، پیپر ریڈنگ،دوچاپی، کتاب میڑہ، شیئر ءُ شائری ءُ ساز زیملی بھر ھوار بوتگ انت۔
دیوان ءِ بندات کنگ ءَ پیش اُستاد سباء دشتیاری ءِ یات ءٙ دو ساھت بے تواری دارگ بوتگ ءُ دیوان ءِ بندات چہ بلوچ راجی سوت ءٙ کنگ بوتگ۔
دیوانءَ ترانکاراں تران کنان ءَ گُوشتگ کہ دود ءُ ربیدگی روچ ءٙ مراگش اڈ دیگ ءِ مول مراد ھیش انت کہ ماں تنھا یک روچ ءِ بنیاد ءٙ وتی دود ءُ ربیدگ رکینگ ءِ اھد کنگی نہ اِنت، بلکیں وتی یانزدہ ھزار سالیگیں برجاھیں دود ءُ ربیدگ رکینگ ءِ گھگیری ءٙ گیش مھکمی کنگ ءِ جھد اِنت۔ بلوچ راج یک کوھنیں دودمانے ءِ بزاں کہ مھرگڑھ ءِ وارس اِنت۔
آیاں گوشتگ کہ دگنیا کوھنیں دود ربیدگ ،گوستانک، دودمان ءِ وارسی ابید مرچی بلوچ ءِ دود ءُ ربیدگ ءُ زبان ھزاراں درّی ءُ تھی جیڑھانی آماچ اَنت ۔اے جیڑھانی گیش ءُ گیوار کنگ ءِ زمہ واری مئے راجی ادارھانی کوپگ ءٙ اِنت۔ ھستیں وھد ءٙ پہ بلوچ ءَ ھژدری انت کہ بلوچ راج وتی دود ءِ پھازگ ءَ برجاھیں جھد ءٙ گیش ھوار بہ بنت پرچا کہ پہ بلوچ راجی سِنچ ءُ سما ءِ ھلاس کنگ ءَ روچے یک نوکیں شوربندی ءِ ٹھینگ بوگ ءٙ انت۔ ماڈرانائزیشن ءِ لیکہ ءِ بنیاد ءٙ بلوچ ءٙ را پدمنتگ گُشگ بیت ءُ کدی وتگڑیں مذھبی رسم ءُ رواج ءِ بنیاد ءٙبلوچ چاگرد ءِ اساس سیکولرازم ءِ سرا اُرش کنگ بیت ۔ بلے مارا کدی ھم بیھال بوگی نہ اِنت کہ اے اُرش وڑے نہ وڑے ءَ مئے ھزار سالی ئیں دودانی سرا بوگ ءٙ اَنت پمیشکہ مارا وتی دود ءُ ربیدگی گھگیری ءِ تہ گوں ترندی گیشی آرگی اِنت۔
دیوان گڈی بھر ساز ءُ زیملی دیوان بوتگ کہ اود ءَ بلوچی زبان ءِ گشندہ اُستاد بیبرگ بلوچ ءُ استاد نورھان بلوچ ءُ اَبّاس بلوچ ءَ دیوان ءَ را گوں وتی وشیں توار ءَ وش نود کرتگ۔
