بلوچ یکجھتی کمیٹی ءِ جارکش ءَ وتی شنگ کرتگیں درشانے ءَ گوشتگ کہ 25 جنوری ءَ دالبندین ءَ بیتگیں راجی مچی ءَ پد لس مردم یکشل ءَ ترسینگ بوگ ءَ اَنت ءُ آ پہ تاوان دیگ ءَ بیھار دیگ بوگ ءَ اَنت۔ یک بلوچ ڈرائیورے ءَ بلوچ راجی مچی ءَ کنٹینرے ءِ آرگ ءَ دزگیر کنگ بوتگ ءُ کنٹینر ءَ ھم پہ ریاست ءَ گرگ ءِ جھد کنگ ءَاَنت۔ چہ ایشیءَ ھوار لس مردم ءُ راجی مچی ءَ کمک کنوکیں مردم یکشل ءَ بیھار دیگ بوگ ءَ اَنت، بلوچ یکجھتی کمیٹی ءَ سروکاں ھوار کارکنانی سر ءَ باز ایپ آئی آر نبشتہ کنگ بیتگ۔
آئیءَ گوشتگ کہ ما ریاست ءُ دالبندین ءِ واکداراں تچکی ءَ گوشگ لوٹ ایں کہ پہ لس مردمانی ترسینگءُ جانی تاوان دیگ ءَ ما ھچ وڑ ءَ بے توار نہ بہ ایں۔ دالبندین ءِ راجی مچی سرجمءَ ایمن بیتگ۔ سرجمیں مچی ءِ میان ءَ نہ کسے ءَ تاوان بیتگ ءُ نہ کانود ءُ راھبند پروشگ بیتگ۔ چہ ایشی ءَ ابید دالبندین ءِ مردمانی دلسیاہ کنگ ءُ بیھار دیگ ریاستی ناشرکاری زانگ بیت ءُ ما چہ اے زوراکی ءِ بگیری ءَ ھچ وڑ ءَ بے توار نہ بہ ایں۔
جارکش ءَ گوشتگ کہ ما دالبندین ءِ ریاستی انتزامیہ ءَ تچکی ءَ گوشگ لوٹ ایں کہ دزگیر کرتگیں ڈرائیور زوت یل کنگ بہ بیت، لس مردمانی بیھار دیگ ءُ ترسینگ ءِ درچ بند کنگ بہ بیت، اگاں نہ دالبندین ءَ ھوار سرجمیں بلوچستان ءَ زھرشانی کن ایں ءُ نندانک ءَ نند ایں۔
