بلوچ راجی راھشون ءُ بلوچستان لبریشن پرنٹ ءِ سرکماش ڈاکٹر اللہ نزر ءَ ماں چاگردی رسانکدر ءِ تندجاہ بلیو اسکائی ءَ نبشتگ کہ بلوچستان ءَ پاکستانی لشکر ءَ پروش وارتگ کہ نوں وتی لاشاں چیر دیگ ءُ راستیانی چیر دیگ ءِ جُھد ءَ کنگ ءَ اِنت۔
آئی ءَ گْوشتگ کہ پاکستانی لشکر انگیں پروش ورگ ءَ پد نہ ایوک ءَ جنگ ءِ پِڑ ءَ اکلاکی ءُ زھنی پروش ءِ آماچ اِنت بلکیں وتی لاشانی چیر دیگ ءُ راستیانی چیر دیگ ءِ جُھد ءَ کنگ ءَ اِنت۔
بلوچ راھشون ءَ گْوشتگ کہ چہ گوادر ءَ بگر داں کوہ سلیمان ءَ پروش وارتگیں لشکر بے میاریں بلوچ راج ءَ نشانگ کنگ ءَ اِنت۔
ڈاکٹر اللہ نزر ءَ گْوشتگ کہ اے زوراکی نہ ایوک ءَ انسانی ھکانی بگیری اَنت بلکیں یک زورگریں ریاستے ءِ رستری ءَ پدر کن اَنت۔
آئی ءَ گْوشتگ کہ گوادر وئیل ءُ آدگہ وئیل اے گپ ءِ شاھدی ءَ دے اَنت کہ وھدے پاکستانی لشکر جنگ ءِ پِڑ ءَ دیم پہ دیمی کُرت نہ کنت گڑا بے میاریں مردماں کُش ایت ءُ وتی پروش ءِ بیر ءَ گیت۔
بی ایل ایپ ءِ سرکماش ءَ گْوشتگ کہ پروش وارتگیں پاکستانی لشکر ءِ بے میاریں بلوچانی نشانگ کنگ چکچینی یے۔ داں انوں بلوچ راج ءَ پہ وتی آجوئی جُھد ءَ باز اوپار کُرتگ بلے اگاں اے زوراکی برجاہ بہ بیت گڑا آ روچ دور نہ اِنت کہ بلوچ راج لاچار بیت ءُ ٹوھیں گامگیجے زور ایت،چہ ایشی ءَ پنجاب ءُ اسلام آباد ءِ پھریزگ مُشکل بیت۔
