تُربَت: شھید پدا چاراہ ءَ زھرشانی ءَ نشتگیں شھید زریپ ءِ کھول ءَ پریس کانپرنس کرتگ ءُ گوشتگ کہ ما بلوچ مرچی ھما جاہ ءَ سر بیتگیں کہ لاش چست کنگ ءَ اِیں بلے پرس دارگ ءَ نہ ایں۔ ما وتی دود ءُ ربیدگ ءَ داشت کنگ ءَ نہ ایں۔ نبشتہ کار ھمے گپ ءَ نبشتہ بہ کن انت کہ بلوچاں پُرس ءِ دارگ یل داتگ ءُ وتی لاشانی جست ءَ کنگ ءَ اَنت۔
آدینگ ءِ شپ ءَ پاکستانی لشکر ءَ مئے گس ءَ بیڑ برتگ ءُ زریپ بلوچ آوار جتگ ءُ آدینگ ءِ روچ ءَ آئی ژانگولیں لاش دزکپتگ۔ ما آئی لاش ءَ پہ ھژدری چار ءُ ٹپاس ءَ تُربَت ءَ آرگ ءَ بوتگ ایں بلے پاکستانی لشکر ءَ تمپ ءِ درسیں راہ بستگ اَنت ءُ یک ادارے ءَ گیش مارا یک جاھے ءَ داشتگ۔
آئی گوشتگ کہ آیاں مئے لاش تابوت ءِ آرگ ءَ ھم نیشتگ ءُ پاکستانی لشکر ءَ گوں ما زوراکی کرتگ ءُ مارا بیھار داتگ۔ پہ لاش ءِ کل کنگ ءَ لاچار کرتگ۔ ما لاش گلزمین ءِ میار کرتگ ءُ وت مرچی اد ءَ وتی کانودی ھک ءَ ھوار زھرشانی کنگ ءَ ایں کہ مارا انساپ دیگ بہ بیت۔
آئی گوشتگ کہ ما بلوچ اے وھد ءَ پاکستان ءِ راھبند ءُ کانود ءِ تہ ءَ زوراکی ءِ آماچ بوگ ءَ ایں۔ پاکستانی لشکر پمشکا ناشرکاری کنگ ءَ اِنت کہ آ وت ءَ کانود ءِ پاسپان گوْش ایت۔ ھما کانود کہ آئی تہ ءَ زور آور ءَ زور آور کنگ ءَ اِنت ءُ نزور ءَ نزور کنگ ءَ اِنت۔
آئی گوشتگ کہ ما اے پیش دارگ لوٹیں کہ بِلّے پہ زور ءِ سر ءَ مئے مردم کشگ بنت، مارا پہ زور کل کنگ ءَ لاچار کن اَنت بلے مارا زھرشانی ءَ کس داشت نہ کنت۔ زی وھدے کہ ما وتی مردم کل کرتگ آئی جان ءِ ٹپ پاکستانی لشکر ءِ ناشرکاری ءِ پدّریں منّانک انت۔ آئی جان داگ داتگ، زبان بُرّ اتگ، جان سبز بوتگ۔ مئے مردم پاکستانی لشکر ءَ چہ کُشگ ءَ پیش زوراکی ءِ نشانگ کرتگ۔
آئی گوشتگ کہ اے درد مارا سرجمیں زند ءَ ایمن بوگ ءَ نیل ایت، ءُ اے درد مارا سرجمیں زند ءَ گوں پاکستان ءَ کینگ دارگ ءِ درس ءَ دنت۔ اے لشکر وردی ءِ تہ ءَ مردم نہ اَنت تھنا مردم ءِ دروشم ءَ زوراک اَنت ءُ اے کلوہ ءَ ما وتی راج ءِ گس گس ءَ سر کن ایں۔
آئی گوشتگ ما داں ھما وھد ءَ زھرشانی ءَ نندیں داں کہ پاکستانی لشکر ءِ کارمندانی بگیری ءَ کانودی کاروائی کنگ مہ بیت۔ ما اے زھرشانی ءَ دیم ءَ بران کن ایں ءُ باند ءَ تُربَت ءَ تھتگ بند ھرتال ءِ جار ءَ جن ایں ءُ چہ راج ءَ لوٹ کن ایں کہ اے زھرشانی ءِ سوبین کنگ ءَ وتی کرد ءَ پیلو بہ کن اَنت۔
