اسلام آباد: 13 نومبر 2022 ءَ پاکستانی لشکر ءِ دست ءَ زور بیگواہ کنگ بوتگیں ورنا سلمان ءِ مات ءَ گوشتگ کہ من آئی مات اے گپ ءَ نزاناں کہ منی زھگ ءَ چونیں میارباری یے کرتگ کہ آ اے وڑ ءَ زور بیگواہ کنگ بوتگ ءُ مارا درسان ءَ آزار دیگ ءَ اَنت۔ اگاں آئی سر ءَ چونیں بھتامے ھست گڑا آمیدگس ءَ پیش کنگ بہ بیت۔
آئی ءَ گوشتگ کہ منی زھگ سلمان ء مھم جان 13 نومبر ءَ شال ءَ زور بیگواہ کنگ بوتگ۔ آ ھزدار ءَ انجینئرنگ زانشتجاہ ءَ کار ءَ بوتگ ءُ آ پہ وتی نوکری ءِ گرگ ءَ شال ءَ شتگ ءُ زور بیگواہ کنگ بوتگ۔ من چہ ھزدار ءَ سدانی کچ ءَ میل دور سپر کرتگ ءُ اسلام آباد ءَ آتکگاں کہ منی گون ءَ انساپ کنگ بہ بیت۔
آئی گوں مردمی ھکانی ادارھاں لوٹ کرتگ کہ سلمان ءَ ھوار پہ درسیں زور بیگواھیں مردمانی آجوئی ءَ توار چست بہ کن اَنت۔
