تمپ: پاکستانی لشکر بازیں کچے ءَ مُچ بوتگ ءُ زریپ ءِ کھول ءَ بیھار دیگ ءَ اَنت کہ لاش ءَ کل بہ کن اِت۔
زھرشانی ءَ نشتگیں زریپ ءِ کھول ءَ گوشتگ کہ پاکستانی لشکر بازیں کچے ءَ مُچ بوتگ ءُ مارا بیھار دیگ ءَ اِنت کہ لاش ءَ کل بہ کن اِت ءُ زھرشانی ءَ ھلاس بہ کن اِت۔ زھرشانی ءَ نشتگیں مردماں گوشتگ کہ گمان ھمیش اِنت کہ پاکستانی لشکر مئے سر ءَ زوراکی بہ کنت۔
آیاں گوشتگ کہ ما چہ کلاهو، آسیا آباد، نزر آباد، تمپ، پهل آباد، گومازی، مند، بالیچہ، رودبن، رئیس آباد، میر آباد، ھوت آباد، هیرآباد، ناسر آباد ءُ نزیک ءُ گورانی مردماں لوٹ کنیں کہ آ گیش ءَ چہ گیش زھرشانی ءَ بیا اَنت ءُ گوں ما ھمراہ بہ بنت۔
دومی نیمگ ءَ مرچی تُمپ ءَ مردماں پاکستانی لشکر ءِ زوراکی ءُ زریپ ءِ ناھکیں کوش ءِ بگیری ءَ دکان بند کُرتگ۔
پرندوشی پاکستانی لشکر ءَ زریپ ءِ لوگ ءَ بیڑ بُرتگ اَت ءُ زریپ آوار جتگ اَت،زی آئی ءِ ژانگولیں لاش دزکپتگ اَت، کھول ءَ لاش زُرتگ ءُ تربت ءَ پہ زھرشانی ءَ روگ ءَ اَت کہ دوشیگین اِنت کہ پاکستانی لشکر ءَ آسیاباد ءَ کھول داشتگ ءُ دیم ءَ روگ ءَ نیلگ ءَ اِنت۔
