تربت: چہ کراچی ءَ پاکستانی پوج ءِ دست ءَ زور بیگواھیں مھمد ھاسل ءُ ابدلستار ءِکھول ءَ پہ آیانی آجوئی ءَ لوٹ کرتگ۔
کھول ءِ گوشگ اِنت کہ مھمد ھاسل ء ھدا بندگ ءُ ابدلستار ء مراد شاہ تمپ ءِ میتگ سرنکن ءِ جاہ منند اَنت کہ 10 اکتوبر ءِ شپ ءِ دوازدہ ءُ نیم ءَ پاکستانی پوج ءُ چیریں ادارھانی کارمنداں چہ کراچی ءِ ھند رئیس گوٹ ءَ آوار جتگ ءُ بیگواہ کرتگ اَنت۔ داں انوں آیانی ھچ وڑیں ھال نیست۔
آئی گوشگ اِنت کہ مئے مردم گوں ھچ وڑیں درکانودی کاراں ھوار نہ بیتگ اَنت، آیاں مزدوری کرتگ ءُ وتی گس والینتگ۔ چہ آیانی زوریں بیگواھی ءَ مئے سرجمیں کھول جنجال اِنت۔
کھول ءَ گوشتگ کہ زوریں بیگواھی یک درکانودی کارے ءُ ڈیھءِ کانود ءُ انسانی ھکانی تچک ءَ بگیری اِنت۔
کھول ءَ گوں سرکار ءَ لوٹ کرتگ ءُ گوشتگ کہ اگاں آیانی سر ءَ چونیں ھم بھتامے ھست گڑا آمیدگس ءَ پیش کنگ بہ بنت۔ اگاں مئے پریاد گوش دارگ نہ بوت گڑا ما لاچاریں کہ زھرشانی کن ایں۔
